Kryeministri britanik Keir Starmer tha se Mbretëria e Bashkuar ka qenë në dijeni të bisedimeve midis Shteteve të Bashkuara dhe Iranit ditët e fundit.

Duke iu drejtuar deputetëve, Starmer tha: “Për të qenë i qartë për komisionin, ne ishim në dijeni se kjo po ndodhte.”

Ai theksoi se përparësia aktuale është zgjidhja e shpejtë e konfliktit dhe arritja e një marrëveshjeje të negociuar që do të përfshinte kushte të rrepta për Iranin, veçanërisht në lidhje me armët bërthamore, raporton SkyNews.

Megjithatë, ai paralajmëroi gjithashtu se nuk duhet krijuar një “ndjesi të rreme sigurie” me shpresën e një përfundimi të shpejtë të luftës.

Ai theksoi se, ndërsa fokusi do të ishte në qetësimin e shpejtë të situatës, Mbretëria e Bashkuar duhet të planifikojë gjithashtu mundësinë që konflikti të zgjasë për një periudhë më të gjatë kohore.