Shefja e GP-së së LVV-së, Arbërie Nagavci, ka deklaruar se subjekti politik që ajo përfaqëson është i gatshëm të japë kontribut në hartimin e një rezolute për mbrojtjen e viktimave të luftës së fundit në vend, raporton Ekonomia Online.

Kjo deklaratë vjen pas një sërë gabimesh që u evidentuan në ekspozitën e hapur më 24 mars në sheshin e Prishtinës, e cila u mbyll vetëm pak ditë më vonë.

“Sikurse e diskutuam edhe në takimin e Kryesisë, LVV është e gatshme të kontribuojë në një rezolutë që do të paraqiste përmbajtësisht në aspekt shumëdimensional çështje që trajtojnë luftën e fundit. Në lidhje me këtë, ne jemi të gatshëm të delegojmë deputetët tanë, që bashkë me deputetët e GP-ve tjera që të vijnë me një rezolutë e cila i adreson këto çështje në mënyrën më të mirë të mundshme”, deklaroi Nagavci, teksa shtoi se pret që deri në fund të ditës të sillet një draft për miratim në Kuvend.