Organizata Botërore e Shëndetësisë ka shpallur shpërthimin e virusit Ebola në provincën lindore Ituri të Republikës Demokratike të Kongos si një emergjencë të shëndetit publik me rëndësi ndërkombëtare.

Agjencia njoftoi se shpërthimi, ku janë raportuar rreth 246 raste të dyshuara dhe 80 viktima, ende nuk i plotëson kushtet për t’u konsideruar një pandemi globale.

Drejtori i përgjithshëm i OBSH-së, Tedros Adhanom Gebrejesus, paralajmëroi se aktualisht ka “pasiguri të mëdha lidhur me numrin e vërtetë të personave të infektuar dhe përhapjen gjeografike” të virusit.

Sipas OBSH-së, varianti aktual i Ebolës shkaktohet nga virusi Bundibugyo, për të cilin ende nuk ekzistojnë ilaçe apo vaksina të miratuara, shkruan BBC.

OBSH-ja bëri të ditur se deri tani janë konfirmuar tetë raste laboratorike të virusit, ndërsa raste të tjera të dyshuara dhe vdekje janë raportuar në tri zona shëndetësore, përfshirë qytetin Bunia, kryeqendra e provincës Ituri, si dhe qytetet minerare të arit Mongwalu dhe Rwampara.

Agjencia botërore e shëndetësisë shtoi se virusi tashmë është përhapur edhe jashtë DR Kongos, pasi dy raste të konfirmuara janë raportuar në Uganda fqinje.

Autoritetet ugandeze thanë se një burrë 59-vjeçar, i cili vdiq të enjten, kishte rezultuar pozitiv me virusin.

Shtetet që kufizohen me DR Kongon konsiderohen me rrezik të lartë për përhapje të mëtejshme të virusit për shkak të lëvizjes së popullsisë, tregtisë dhe udhëtimeve të shpeshta.