Një aksident tragjik ka tronditur Holandën, pasi tre persona, përfshirë dy fëmijë, humbën jetën kur një automjet u përplas me një grup çiklistësh gjatë një ekskursioni shkollor.

Ngjarja e rëndë ndodhi në një rrugë pranë Vogelwaarde, në provincën e Zeeland, ku një grup nxënësish po lëviznin me biçikleta nën mbikëqyrjen e shoqëruesve të tyre.

Sipas raportimeve të mediave të huaja, automjeti ka goditur një grup prej 14 fëmijësh që po merrnin pjesë në ekskursionin shkollor, së bashku me dy persona të rritur që i shoqëronin gjatë aktivitetit, transmeton Klankosova.tv.

Përplasja rezultoi fatale për tre persona, të cilët vdiqën në vendin e ngjarjes, ndërsa bëhet e ditur se viktimat janë dy fëmijë dhe një i rritur.

Përveç viktimave, katër fëmijë të tjerë kanë pësuar lëndime të rënda trupore dhe janë transportuar me urgjencë në spital për trajtim mjekësor.

Deri më tani, autoritetet nuk kanë bërë të ditura identitetet apo moshat e të plagosurve.

Në një deklaratë zyrtare, autoritetet lokale konfirmuan përmasat e tragjedisë.

“Një makinë përplasi një grup prej 14 fëmijësh me biçikleta dhe dy shoqërues gjatë ekskursionit të tyre shkollor. Gjatë këtij incidenti, për fat të keq humbën jetën tre persona, përfshirë dy fëmijë dhe një të rritur”, thuhet në njoftimin e autoriteteve.

Menjëherë pas aksidentit, në vendngjarje kanë dalë ekipet e emergjencës, policia dhe shërbimet mjekësore, të cilat kanë ofruar ndihmën e parë për të lënduarit dhe kanë siguruar zonën.

Ndërkohë, policia holandeze ka nisur hetimet për të zbardhur shkaqet dhe rrethanat që çuan në këtë aksident tragjik.

Aksidenti ka shkaktuar tronditje të madhe në komunitetin lokal dhe më gjerë, ndërsa familjet e viktimave dhe qytetarët po përballen me pasojat e një prej ngjarjeve më të rënda të ditëve të fundit në vend.