Njësia Rajonale për Hetimin e Krimeve Ekonomike dhe Korrupsionit në Ferizaj ka zhvilluar të martën një aksion të gjerë në kuadër të luftimit të shmangies së tatimit, informalitetit dhe shkeljeve të tjera ligjore që lidhen me marrëdhëniet e punës.

Sipas njoftimit zyrtar, aksioni është realizuar me autorizim të Prokurorisë Themelore në Ferizaj dhe në bashkëpunim me institucionet e tjera ligjzbatuese, transmeton Klankosova.tv.

Gjatë kontrollit të zhvilluar nga ora 09:20 deri në 15:30 janë inspektuar gjithsej 32 auto-parkingje në qytetin e Ferizajt. Sipas autoriteteve, gjatë inspektimeve janë evidentuar shkelje të ndryshme të kryera nga pronarët e bizneseve.

Inspektorët kanë përpiluar procesverbale për të gjitha gjetjet e konstatuara, ndërsa është bërë e ditur se në vazhdim do të ndërmerren veprimet procedurale në përputhje me kompetencat ligjore.