Autoritetet spanjolle u kanë lejuar mijëra personave të evakuuar për shkak të zjarreve të pyjeve të kthehen në shtëpitë e tyre, pasi janë hequr kufizimet në zonat e Toledos, Madridit, Ávilës dhe Castellónit.

Vetëm në rajonin e Madridit, rreth 24 mijë banorë janë lejuar të kthehen, ndërsa kufizimet janë hequr edhe për rreth 20 mijë persona të tjerë.

Spanja dhe Franca po përgatiten për valën e katërt të të nxehtit këtë verë. Disa zjarre ende vazhdojnë të digjen, përfshirë një në Burgohondo, rreth 150 kilometra në perëndim të Madridit.

Në jugperëndim të Francës, zjarret më të mëdha në rajonin Gironde konsiderohen ende “të stabilizuara”, por autoritetet paralajmërojnë për erëra të thata dhe temperatura që mund të arrijnë deri në 41 gradë Celsius.

Kryeministri spanjoll Pedro Sánchez ka paralajmëruar se 12 orët e ardhshme do të jenë “vendimtare” për shuarjen e zjarrit pranë kryeqytetit. Ai tha se situata po përmirësohet, por kërkohet kujdes maksimal për shkak të temperaturave të larta, lagështisë së ulët dhe erërave të forta.

Një zjarr mbetet jashtë kontrollit në Vall d’Uixó, në veriperëndim të Valencias.

Zjarri në Burgohondo, në provincën Ávila, ka djegur më shumë se 43 mijë hektarë tokë dhe konsiderohet zjarri më i madh i regjistruar ndonjëherë në historinë e Spanjës. Ai ka detyruar rreth 40 mijë njerëz të largohen nga shtëpitë e tyre.

Ekipet e zjarrfikësve janë të shqetësuara se temperaturat e larta mund të shkaktojnë riaktivizimin e flakëve dhe po përpiqen të stabilizojnë një perimetër prej 180 kilometrash.

Deri tani nuk janë raportuar viktima në zjarret rreth Madridit dhe Castellónit, por në jug të Spanjës një grua ka vdekur në spital nga plagët e marra në zjarrin e Los Gallardos, në Almería. Në atë zonë kishin humbur jetën 14 persona.

Zjarre janë raportuar edhe në Portugali, në rajonin Vila Real, si dhe në Greqi, në ishullin Paros dhe në qytetin jugor Trifylia, shkruan BBC.