Sipas raportimeve nga Italia, Fenerbahçe po përgatit një ofertë të re për Milanin për transferimin e Rafael Leaos, i cili ndërkohë i është bashkuar bashkëlojtarëve të tij në Australi për fazën përgatitore para sezonit të ri.

Reprezentuesi portugez e ka bërë të qartë disa herë se dëshiron të largohet gjatë kësaj vere, ndërsa edhe Milani nuk ka ndërmend t’ia rinovojë kontratën, e cila skadon në qershor të vitit 2028.

Megjithatë, klubi italian kërkon të paktën 50 milionë euro, plus bonuse që do ta çonin vlerën totale të marrëveshjes në 60 milionë euro. Gjithashtu, Milani nuk është i gatshëm të pranojë një formulë huazimi me opsion ose detyrim blerjeje.

Fenerbahçe kishte dërguar javën e kaluar drejtuesit e saj në Itali për bisedime, të cilat ishin kryesisht eksploruese, me qëllim që të kuptonin kushtet e nevojshme si për një marrëveshje mes klubeve, ashtu edhe për kushtet personale të lojtarit.

Raportohet se Leao kërkon një pagë prej 10 milionë eurosh në sezon.

Sipas “Calciomercato”, Fenerbahçe pritet të paraqesë një ofertë zyrtare brenda ditëve të ardhshme, tashmë që ka një ide të qartë për kërkesat e Milanit dhe të lojtarit.

Ndërkohë, Leao ka udhëtuar drejt Perthit të Australisë, ku po stërvitet nën urdhrat e trajnerit Ruben Amorim së bashku me pjesën tjetër të skuadrës së Milanit.

Për 26-vjeçarin interesim kanë shfaqur edhe Galatasaray dhe Benfica, ndërsa deri tani ai nuk ka marrë oferta konkrete jashtë Superligës turke.