Politikani rus kundër luftës, Boris Nadezhdin, tha të hënën se ishte larguar nga vendi për momentin, disa javë pasi Moska e shpalli atë “agjent të huaj” dhe e skualifikoi nga kandidimi në zgjedhjet parlamentare.

“Përshëndetje të gjithëve! Kam disa lajme të mira. Jam gjallë dhe i lirë. Fatkeqësisht, nuk jam në Rusi për momentin”, tha Nadezhdin, duke qëndruar përpara Kullës Eiffel në Paris, në një video të shkurtër të postuar në Telegram.

“Tani për tani, duhet të orientohem dhe të kuptoj se çfarë të bëj më pas. Do të shkruaj për planet e mia më vonë.”

Nadezhdin, 63 vjeç, një ish-ligjvënës liberal, ka qenë një kritik i hapur i luftës së Moskës në Ukrainë, por – ashtu si disa politikanë të tjerë të opozitës – ishte përpjekur të punonte brenda rregullave të sistemit politik të kontrolluar fort të Rusisë për të qenë në gjendje të vazhdonte të shprehte publikisht pikëpamjet e tij.

Largimi i tij shënon humbjen e një tjetër zëri të shquar opozitar, i gatshëm të sfidojë Kremlinin nga brenda Rusisë, me shumicën e kritikëve të presidentit Vladimir Putin që tani janë ose në burg ose në mërgim.

Shpresat e tij për të kandiduar për në parlament në shtator u shuan kur Ministria e Drejtësisë e shtoi atë më 10 korrik në listën e saj të “agjentëve të huaj” – një etiketim që përdoret gjerësisht nga autoritetet për njerëzit që ato i konsiderojnë të angazhuar në aktivitete anti-ruse me mbështetje të supozuar nga jashtë.