Topi me të cilin Diego Maradona shënoi golin e famshëm me “Dorën e Zotit” ndaj Anglisë në Kupën e Botës 1986 do të dalë në ankand në Shtetet e Bashkuara më vonë gjatë këtij muaji.

Topi i përdorur në fitoren 2-1 të Argjentinës ndaj Anglisë në çerekfinale do të hidhet në ankand nga data 21 deri më 23 gusht. Sipas AFP, ofertat do të nisin nga 2.5 milionë dollarë, ndërsa vlera e tij e parashikuar pritet të kalojë 10 milionë dollarë.

Ndeshja mes Argjentinës dhe Anglisë është një prej përballjeve më ikonike në historinë e Kupës së Botës.

Maradona shënoi të dy golat e Argjentinës, me të parin që erdhi në mënyrë kontroverse, pasi legjenda argjentinase e dërgoi topin në rrjetë me dorë, në një moment që më vonë do të mbetej i paharruar si “Dora e Zotit”.

Vetëm pak minuta më vonë, Maradona realizoi edhe një nga golat më të famshëm në historinë e futbollit, duke nisur një aksion individual nga gjysmëfusha e tij dhe duke dribluar disa kundërshtarë përpara se të shënonte.

Topi është ruajtur për më shumë se tre dekada nga Ali Bennaceur, arbitri tunizian që drejtoi atë ndeshje. Bennaceur ka deklaruar se e mori topin pas përfundimit të takimit dhe më pas e firmosi bashkë me asistentët e tij.

Sipas Heritage Auctions, topi është autentikuar nga dy kompani të specializuara në memorabiliet sportive, duke i dhënë atij një rëndësi të veçantë në tregun e koleksionistëve.

Interesi për objektet e lidhura me atë ndeshje pritet të jetë i madh. Në vitin 2022, fanella e Maradonës nga e njëjta përballje u shit në ankand për një shifër rekord prej 9.3 milionë dollarësh.

Tashmë, topi që ishte pjesë e një prej momenteve më kontroverse dhe njëkohësisht më të famshme të historisë së Kupës së Botës mund të vendosë një tjetër rekord në botën e memorabilieve sportive.