Disa persona, mes tyre edhe fëmijë, u vranë pasi një person i armatosur hapi zjarr në një banesë në qytetin Billings, në shtetin amerikan të Montanës.

Ngjarja ndodhi pranë zonës West End, dhe autoritetet e kanë përshkruar fillimisht si një incident familjar.

Sipas policisë, personi i armatosur i vuri flakën banesës dhe më pas vrau veten me armë zjarri. Sherifi i përkohshëm i Qarkut Yellowstone, Kent O’Donnell, tha se në banesë humbën jetën “shumë persona, mes tyre dhe disa të mitur”.

Numri dhe identiteti i viktimave nuk janë bërë ende zyrtarisht të ditura. Ndërkohë, një faqe për mbledhjen e fondeve GoFundMe pretendon se në incident kanë vdekur të paktën tetë persona, përfshirë dy fëmijë.

Policia u njoftua pasi një qytetar raportoi se kishte dëgjuar të shtëna. Oficerët mbërritën rreth 10 minuta më vonë dhe dëgjuan të shtëna nga pjesa e pasme e banesës. Pak minuta më pas, shtëpia u përfshi nga flakët.

Zjarrfikësit u përballën me vështirësi për shkak të aksesit të kufizuar në ujë dhe mungesës së hidrantëve të mjaftueshëm. Sipas shefit të zjarrfikësve të Billings, Matt Hoppel, kushtet e zjarrit u përkeqësuan dhe banorët nuk mundën të shpëtonin.

Autoritetet vijojnë hetimet për zbardhjen e plotë të rrethanave të ngjarjes. Shkaku i zjarrit dhe motivi i sulmit mbeten ende nën hetim.