Ish-trajneri i Liverpoolit, Arne Slot, ka siguruar një rol të ri në futboll, katër muaj pasi u shkarkua nga klubi i Premierligës.

Slot u shkarkua në fund të sezonit 2025/26, pasi Liverpooli e përfundoi kampionatin në vendin e pestë, duke dështuar ta mbrojë siç duhet titullin e Premierligës, të cilin “Të Kuqtë” e kishin fituar në sezonin e parë të holandezit në krye të skuadrës.

Pavarësisht lidhjeve me kombëtaren e Holandës dhe pozitën e trajnerit të Fulhamit, Slot kishte qëndruar jashtë futbollit deri më tani.

Ish-trajneri i Feyenoordit është emëruar në një nga Grupet e Vëzhguesve Teknikë të UEFA-s, përpara sezonit 2026/27.

Ky rol përfshin vëzhgimin dhe analizimin e ndeshjeve nga këndvështrimi i trajnerëve, ndërsa Vëzhguesit Teknikë të UEFA-s janë përgjegjës për përzgjedhjen e Lojtarit të Ndeshjes për secilën javë të Ligës së Kampionëve.

Grupi gjithashtu diskuton dhe analizon paraqitjet gjatë përzgjedhjes së ekipit, lojtarit, lojtarit të ri dhe golit të sezonit.

Sipas UEFA-s: “Gjatë secilës ndeshje, Vëzhguesi Teknik i caktuar nga UEFA bashkëpunon me ekipin e Analizës së Performancës së UEFA-s për të mbledhur video dhe të dhëna. Vëzhguesit Teknikë të UEFA-s marrin pamje nga kënde të ndryshme, përfshirë pamjet televizive, taktike dhe ato nga prapa, nga një pozicion i ngritur, të cilat mund t’i shqyrtojnë drejtpërdrejt në stadium ose nga distanca.

“E gjithë përmbajtja e mbledhur nga Vëzhguesit Teknikë të UEFA-s ruhet në një bazë të dhënash edukative dhe pasurohet me mjete të avancuara për shënimin dhe analizimin e videove, me qëllim që të theksohen aspektet kryesore teknike dhe taktike.

“Të dhënat e ndeshjeve, nga numri i pasimeve, goditjeve apo krosimeve, deri te të dhënat më të avancuara për distancat e përshkuara, pasimet që thyejnë linjat kundërshtare dhe presingun, ofrojnë një thellësi shtesë në vlerësimin e temave si analiza e sistemeve të lojës, modelet e shënimit të golave, ndërprerjet, portierët, kundërsulmet apo rolet e mbrojtësve të krahut dhe anësorëve që futen në qendër të fushës”.

Megjithatë, Slot nuk është i vetmi që është emëruar nga UEFA, pasi këtë rol e kanë marrë edhe ish-trajneri i Manchester Unitedit, Erik ten Hag, si dhe ish-trajneri i Liverpoolit, Chelseat, Newcastle Unitedit dhe Evertonit, Rafael Benítez.

Në këtë pozitë janë emëruar gjithashtu Ryan Giggs, Ole Gunnar Solskjær, Thomas Frank dhe Sean Dyche.

Duke e shpjeguar këtë rol vitin e kaluar, Solskjær kishte thënë: “Roli im përfshin udhëtimin drejt ndeshjeve dhe analizimin nga afër të cilësisë teknike dhe qasjes taktike, si dhe përzgjedhjen e Lojtarit të Ndeshjes. Është një mënyrë vërtet e shkëlqyer për t’i vëzhguar nga afër skuadrat më të mira dhe për të qenë në hap me tendencat. Gjithashtu, kam mundësinë të takohem me kolegë të rinj dhe të vjetër të futbollit në një ambient më të relaksuar”.

Liga e Kampionëve rikthehet javën e ardhshme, me zhvillimin e ndeshjeve të javës së katërt./GazetaExpress/

Të gjithë 36 Vëzhguesit Teknikë të UEFA-s për sezonin 2026/27

Roberto Martínez

Erik ten Hag

Ole Gunnar Solskjær

Thomas Frank

Rudi Garcia

Gaizka Mendieta

Kasper Hjulmand

Rafa Benítez

Ernesto Valverde

Frank de Boer

Rui Faria

Sean Dyche

Aitor Karanka

Avram Grant

Roy Hodgson

Sir Gareth Southgate

Ange Postecoglou

Arne Slot

Justin Cochrane

David Adams

Ian Woan

Mixu Paatelainen

Michael O’Neill

Kieran McKenna

Claude Makélélé

Zlatko Zahovič

Steve Cooper

Willi Ruttensteiner

Dušan Fitzel

Darren Fletcher

David James

Frans Hoek

Zlatko Dalić

Fatih Terim

Ryan Giggs

Ralph Hasenhüttl