Trajneri i Paris Saint-Germainit, Luis Enrique, shpreson që Manchester City të shmangë ndëshkimin për shkeljen e rregullave, duke këmbëngulur se klubi meriton vlerësim për sukseset dhe trofetë e fituar gjatë viteve të fundit.

City vazhdon të jetë në qendër të një çështjeje të paprecedentë lidhur me akuzat financiare, pasi një komision i pavarur e shpalli fajtor për 114 shkelje të pretenduara nga Premierliga.

Premierliga pretendoi se klubi përdori marrëveshje sponsorizimi “fiktive” për t’i fryrë të ardhurat me 900 milionë funte.

Megjithatë, City vazhdon të mohojë çdo shkelje, duke këmbëngulur në pafajësinë e tij dhe duke iu referuar “provave të pakundërshtueshme” për ta mbështetur mbrojtjen.

Një komision i pavarur do ta shqyrtojë çështjen, ndërsa vendimi pritet para fundit të vitit. Një pjesë e rëndësishme e mbrojtjes së Cityt, siç kuptohet, është pretendimi se marrëveshjet e sponsorizimit ishin të ligjshme dhe financoheshin nga qeveria e Abu Dhabit, e jo nga pronarët e klubit, Abu Dhabi United Group (ADUG).

Skuadra e Enzo Marescas u rikthye në aksion në Premierligë për herë të parë që nga shpallja e vendimit dhe të dielën siguroi një fitore 3-0 ndaj Liverpoolit.

Siç pritej, lojtarët e Cityt u pritën me vërshëllima dhe brohoritje kundërshtuese kur dolën në fushë në “Anfield”, pas pushimit për ndeshjet e kombëtareve.

Vëmendja e tyre më pas u përqendrua te përballja në Ligën e Kampionëve kundër kampionit në fuqi të Evropës, PSG-së.

Trajneri i kampionëve francezë, Enrique, u pyet për akuzat që vazhdojnë të rëndojnë mbi klubin anglez.

Enrique dhe ish-trajneri i Cityt, Guardiola, të cilët kanë luajtur së bashku te Barcelona, janë vendosur ndër trajnerët më të suksesshëm të futbollit modern.

Guardiola ka fituar shumë trofe gjatë kohës së tij në “Etihad”, ndërsa Enrique e lavdëroi punën “e jashtëzakonshme” të bashkëkombësit të tij, duke lënë të kuptohet se do të dëshironte që City t’i shmangej sanksioneve.

“Ka shumë zhurmë rreth Manchester Cityt dhe shpesh ka zhurmë edhe rreth klubeve të mëdha”, tha Enrique.

“Duhet vetëm të presim dhe të shohim se cili do të jetë vendimi përfundimtar. Shpresoj që gjithçka të përfundojë mirë për Manchester Cityn, sepse mendoj se ajo që kanë bërë në fushë gjatë viteve të fundit ka qenë e jashtëzakonshme dhe ata sigurisht e kanë merituar t’i fitojnë në fushë të gjithë trofetë që kanë fituar. Tani duhet të presim për të parë se çfarë do të vendosin autoritetet ose çfarë do të thotë gjykatësi”, shtoi ai.

Ai shtoi: “Trofetë që i fiton në fushë, mbeten në fushë. Ata e merituan t’i fitonin dhe shpresoj që të mund ta shmangin ndëshkimin. Por duhet të presim. Gjërat që do t’i them Pepit, do t’ia them privatisht”.

Ka pasur thirrje që City të përballet me një ndëshkim të ashpër nëse ankesa e tij dështon, përfshirë përjashtimin nga Premierliga.