Prokurori i rastit të Astrit Deharit, Metush Biraj, në një përgjigje për Gazetën Express ka thënë se deri më tani nuk e kanë marrë ekspertizën që tregon për rezultatin e autopsisë. Biraj i është përgjigjur avokatit të familjes Dehari, Tomë Gashi, që ka deklaruar se ka konfirmim nga instituti në Lozanë se ekspertiza ka disa ditë që është kryer.

Biraj ka thënë se rasti është ende në fazë të hetimeve, e për këtë nuk mund të japë më shumë informacione.

“Asnjë rast që hetohet edhe e kemi rastin në procedurë nuk mundemi me dhënë informata, nuk mundemi me dhënë përgjigje as tash”, thotë ai.

I pyetur nëse ekspertiza ka arritur apo jo, Biraj shton se për këtë është informuar përmes mediave.

“Edhe unë tash këtë informatë po e shoh përmes mediave, te ne ende asgjë nuk ka arritur”, shton ai, shkruan Gazeta Express.

Në anën tjetër, avokati i familjes Dehari, Tomë Gashi, ka thënë se ka marrë informacion nga vetë instituti në Lozanë se autopsia është kryer pak ditë para zgjedhjeve të jashtëzakonshme të gjashtë tetorit, mirëpo autorizimin e rezultateve të saj i është thënë se e ka institucioni që e ka përcjellë kërkesën, pra Ministria e Drejtësisë.

“Masi e kanë marrë informatën ju kanë drejtu me shkresë, me i njoftu se është kry eskpertiza, kanë thënë se eshtë kry edhe i kanë thënë se i kanë autorizu që e kanë kry ekspertizën. I kemi falënderu edhe i kemi kërkuar një kopje pastaj i kemi shkru Ministrisë së Drejtësisë në këtë kërkesë është edhe për prokurorin Lumezi ministria e ka dërgu i kemi kërkuar që të dërgohet edhe në gjuhën që është përpilu”, thotë Gashi, derisa shpjegon se ende nuk kanë marrë asnjë përgjigje.

Në Ministrinë e Drejtësisë, nuk kanë folur për këtë temë.

Astrit Dehari ishte aktivist i Lëvizjes Vetëvendosje, u arrestua më 30 gusht të vitit 2016, i dyshuar se bashkë me aktivistë të tjerë sulmuan Kuvendin e Kosovës.

Ai vdiq më 5 nëntor të po të njëjtit vit, në Qendrën e Paraburgimit në Prizren, ku raporti i Institutit të Mjekësisë Ligjore rreth shkaqeve të vdekjes së Astrit Deharit më 18 nëntor 2016 doli në përfundim se Dehari ka bërë vetëvrasje, por rezultatet e këtij raporti nuk u pranuan nga prindërit e të ndjerit.

Në tetorin e vitit të kaluar Qeveria e Kosovës me kërkesë të ministrit të Drejtësisë, Abelard Tahiri, ka ndarë mjetet financiare në shumën prej 50 mijë eurove për ekspertizë shtesë jashtë vendit në lidhje me vdekjen e Astrit Deharit.