Ministri i Infrastrukturës, Arban Abrashi, ka vizituar sot Komunën e Obiliqit, ku është pritur nga kryetari, Xhafer Gashi.Abrashi bashkë me Gashin kanë vizituar disa projekte infrastrukturore që janë duke u kryer në Komunën e Obiliqit, e që janë investim i Ministrisë së Infrastrukturës.

Ministri Abrashi tha se në Obiliq janë duke u kryer projekte të rëndësishme infrastrukturore që do të ndikojnë në zhvillimin e bizneseve dhe lidhjen e kësaj komune me fshatrat.“Në Obiliq janë duke u kryer projekte infrastrukturore të rëndësishme, por kisha veçuar këtu ndërtimin e sheshit të qytetit që është pothuajse në fazën përfundimtare, dhe është projekt i Ministrisë së Infrastrukturës.

Po ashtu po vazhdon asfaltimi në lagjen ‘Hade e Re’, me total mbi gjashtë kilometra dhe në tërësi si projekt pritet të përfundojë në vjeshtën e vitit të ardhshëm. Në Obiliq do të kemi edhe projekte të reja vitin e ardhshëm, për ta kompletuar infrastrukturën e kësaj komune”, tha Abrashi.

Ndërsa kryetari i Obiliqit, Xhafer Gashi, tha se bashkëpunimi i mirëfilltë institucional në mes Ministrisë së Infrastrukturës dhe Komunës së Obiliqit ka bërë që të realizohen projekte të rëndësishme infrastrukturore që kanë ndikim të drejtpërdrejtë në mirëqenien e qytetarëve.