Kreu i Bashkimit Demokratik për Integrim, Ali Ahmet, në tubimin e të enjtes me qytetarët në Gostivar gjatë fjalës së tij theksoi se nuk do të lejojë të preket ligji për gjuhën shqipe, pasi, siç shtoi, është larë me gjak.

Ahmeti e bëri të qartë se nuk është e mbyllur çështja e shqyrtimit të Ligjit të gjuhëve në Maqedoni të Veriut dhe se e konsideron si një përpjekje të zhvlerësimit të Marrëveshjes së Ohrit dhe faktorit politik shqiptar nga pushteti i tanishëm, që edhe i paralajmëroi të mos bëhet.

“Këto nuk i kanë shkollat e mia për nacionaliste dhe të organizimeve të forta. Këta janë krejt që vijnë salloneve. Unë nuk jam politikan i salloneve, as i biskotave. Por këto politika nuk na çojnë përpara. Merreni me mend deri ku kanë shkuar gjërat, vendimi dje i Gjykatës Kushtetuese është që ky ligj do të shtyhet për 3 muaj, në mars, eventualisht në maj ku do të thirren ekspert dhe kryetar të partive politike. Çka dmth kjo? Të rinegociohet Marrëveshja e Ohrit, e cila është e garantuar nga SHBA-ja, BE-ja, NATO-ja dhe e larë me gjak nga UÇK-ja”, tha mes të tjerash Ali Ahmeti, kryetar i BDI-së.