Tarifat që paguajnë shqiptarët për internetin me shpejtësi të lartë janë tre herë më të shtrenjta nga mesatarja e Bashkimit Evropian. Kjo e dhënë vjen përmes një raporti të Agjencisë së Komunikimeve Elektronike dhe Postare. Si tarifë krahasuese është marrë tarifa standarde ADSL 4,799 lek/muaj për akses 8 Mbps pa limit.

Nga krahasimi vihet re se kjo tarifë e korrektuar për fuqinë blerëse në Shqipëri është 77 Euro dhe rreth 3 herë më e lartë se mesatarja e vendeve të BE. Numri i pajtimtarëve me akses broadband fiks në fundvitin e 2015 arriti në rreth 243 mijë, që përbën një rritje me rreth 17% në krahasim me fundvitin 2014.

Norma e penetrimit për popullsi në fund të vitit 2015 ishte 9% dhe për familje 33%. Ndërkohë tendencë të kundërt paraqesin tarifat e shërbimeve të tjera elektronike. Sipas AKEP, në vitin 2015 një përdorues celular ka paguar mesatarisht 2.83 lekë/minutë (me TVSH) për thirrjet telefonike dhe ka shpenzuar mesatarisht 512 lekë/muaj (me TVSH) për shërbime celulare. Niveli i këtyre treguesve në Shqipëri është shumë më i ulët se niveli mesatar në vendet e BE dhe ndër më të ultit në rajon.