Një aksident me fatalitet ka ndodhur në Volljakë të Klinës, ku sipas policisë, fillimisht në Qendrën Mjekësore Familjare ka kërkuar ndihmë mjekësore një person i lënduar, i cili ka njoftuar se kishte qenë i përfshirë në një aksident.

Në vendin e aksidentit është konstatuar vdekja e një personi të gjetur në veturë.

Rastin e ka konfirmuar zëdhënësi i policisë për rajonin e Pejës, Fadil Gashi.

“Një i lënduar është paraqitur në QMF në Volljakë të Klinës mëngjesin e sotëm. Mjeku kujdestar ka njoftuar policinë se personi i lënduar ka raportuar se ka qenë i përfshirë në një aksident. Në vendin e ngjarjes kanë dalë policia dhe mjeku kujdestar, ku i njëjti ka konstatuar vdekjen e  një personi të gjetur në veturë. I lënduari pas trajtimit në Emergjencën e Pejës, është liruar për në shtëpi”, tha Gashi.