Dogana e Kosovës është duke zhvilluar një aksion në qytetin e Pejës. Aksioni është duke u zhvilluar në bashkëpunim me Administratën Tatimore të Kosovës.

Kështu ka bërë të ditur për Telegrafin, zëdhënësi i Doganës, Adriatik Stavileci.

Ai bëri të ditur se aksioni po zhvillohet në dhjetë lokacione.

“Në kuadër të planit operativ, Dogana, së bashku me Administratën Tatimore të Kosovës (ATK), janë duke kryer kontrolle në dhjetë lokacione në qytetin e Pejës. Këto kontrolle kanë për qëllim të identifikojnë parregullsitë tatimore, kontrabandën, dhe shmangien e detyrimeve doganore”, tha Stavileci.

Ai shtoi se aksioni është pjesë e përpjekjeve për të forcuar respektimin e ligjit dhe për të parandaluar humbjet e të ardhurave për shtetin.

“Pasi të përfundojnë inspektimet, rezultatet e këtij operacioni do të bëhen të ditura për publikun në kohën e duhur, duke përfshirë detaje mbi masat e marra kundër shkelësve të ligjit”, tha Stavileci.