Kryeministri Kurti ka uruar Edi Ramën për fitoren në zgjedhjet parlamentare në Shqipëri.

Kurti në telegramin e tij të urimit thotë se Kosova nuk mundet pa Shqipërinë dhe Shqipëria pa Kosovën.

Tutje ai nuk ka lënë pa ia kujtuar Ramës edhe ankesat që përfaqësuesit e VV-së në Shqipëri kanë bërë për vjedhje votash.

“Njëkohësisht uroj që institucionet në Shqipëri të sqarojnë çdo paqartësi në lidhje me procesin zgjedhor që askujt të mos i preket e drejta e votës, mbi të cilën themelohet demokracia përfaqësuese.Këto janë pritshmëritë e shqiptarëve, andaj, të punojmë së bashku” shkruan Kurti në facebook.

Postimi i plotë:

Sipas rezultateve paraprake të shpallura nga KQZ në Republikën e Shqipërisë, Partia Socialiste dhe kryeministri Edi Rama ka fituar zgjedhjet parlamentare. Kosova nuk mundet pa Shqipërinë e Shqipëria nuk mundet pa Kosovën, prandaj e përgëzoj kryeministrin e Shqipërisë Edi Ramën për rezultatet, dhe uroj që së bashku, si shqiptarë, të shtojmë bashkëveprimin mes nesh në të gjithë sektorët, si dhe t’i afrojmë standardet evropiane sa i përket demokracisë, zhvillimit ekonomik, drejtësisë e mirëqenies.

Njëkohësisht uroj që institucionet në Shqipëri të sqarojnë çdo paqartësi në lidhje me procesin zgjedhor që askujt të mos i preket e drejta e votës, mbi të cilën themelohet demokracia përfaqësuese.

Këto janë pritshmëritë e shqiptarëve, andaj, të punojmë së bashku.