Në vitin 2018, Alexander Isak shkoi në një mision zbulimi. Ylli 22-vjeçar i Newcastle Untedit, i cili shkëlqeu për Suedinë në “Euro 2020”, udhëtoi për në Eritrea në Afrikën Lindore. Atje, ai u shoqërua me mjedisin e tij, vizitoi një shkollë futbolli dhe u përpoq të kuptonte më mirë rrënjët e tij. Vite më parë, mamaja dhe babai i tij u larguan nga Eritrea e shkatërruar nga lufta në kërkim të një jete më të mirë. Ata emigruan në Solna, një periferi jashtë Stokholmit, ku lindi Isaku. Ishte aty ku sulmuesi, i cili është krahasuar me Zlatan Ibrahimoviqin, u formua si i riu premtues që është sot – me Newcastlen që shpenzoi një shumë rekorde prej 63 milionë funtesh për ta nënshkruar këtë verë.

Katër vjet më parë, Isak u ftua në Eritrea nga ambasadorja Zemede Tekle, komisionarja e Kulturës dhe Sporteve të vendit. Ai ishte kthyer për pak kohë si fëmijë, por jo që nga ngritja e tij epike në futboll.

Edhe pse ai u rrit si suedez, sulmuesi ka qenë gjithmonë besnik ndaj kulturës së tij eritreane. Gjatë qëndrimit të tij, ai mori pjesë në projekte bazë në Asmara përpara se të shikonte një ndeshje mes futbollistëve aspirantë në një stadium lokal. Isaku ishte i impresionuar me atë që pa, dhe kjo ia kujtoi atij edukimin e tij.

“Më pëlqen që fëmijët po stërviten dhe po ndërtojnë të ardhmen e tyre. Unë bëra të njëjtën gjë kur isha i ri, ne ishim shumë fëmijë në të njëjtën fushë. Ky është një projekt interesant dhe është mirë të shohësh se ku zhvillohen fëmijët dhe të udhëhiqeni”, kishte thënë Isak.

Në vitet 1980, babai i tij, Teame, një mësues, donte një të ardhme më të ndritshme për familjen e tij të ardhshme. Eritrea ishte përfshirë në një luftë të gjatë civile që u zhvillua midis organizatave konkurruese për çlirimin e vendit. Teame dhe gruaja e tij vendosën se ishte koha për të lënë vendin e tyre pas prapa, përpara se të mirëpriteshin në Suedi me krahë të hapur. Alexander Isak ka lindur në vitin 1999 në Solna, ku përfundoi duke u stërvitur me ekipin vendas AIK prej moshës gjashtëvjeçare. Atje ai u ndesh me trajnerin Nahom Ghidey, i cili gjithashtu vinte me prejardhje nga Eritrea.

“Ne kishim një lidhje të veçantë, sepse të dy jemi me origjinë nga Eritrea”, tha Ghidey. “Eritreanët janë njerëz krenarë, të fortë dhe patriotë dhe kjo prejardhje ishte me ndikim. Babai i tij, Teame, është mësues dhe Alexander ka marrë gjithmonë shumë dashuri dhe mbështetje nga familja e tij”.

Në moshën 16-vjeçare, Isak bëri debutimin e tij në ekipin e parë të AIK-ut në një ndeshje të Kupës së Suedisë. Ai do të shënonte në paraqitjen e tij 15-minutëshe dhe më vonë do të bëhej golashënuesi më i ri për AIK-un në historinë e ligës, kur shënoi me 16 vjet e 199 ditë kundër Ostersunds FK në fitoren 2:0.

Në ditëlindjen e tij të 17-të, dy golat kundër rivalit të AIK-ut, Djurgardens pa ish-shokun e skuadrës, Chinedu Obasi, t’i bënte atij komplimentin e fundit, megjithëse me njëfarë presioni mbi supet e tij.

“Ai është Zlatan Ibrahimoviqi i ri i Suedisë”, deklaroi Obasi në një vlerësim që alarmoi top klubet evropiane.

Në vitin 2017, Isak iu bashkua Borussia Dortmundit për dhjetë milionë euro, një tarifë rekorde e marrë nga një klub Allsvenskan. Para se të bashkohej me gjigantin e Bundesligës, u raportua se ai refuzoi Real Madridin.

“Kisha disa oferta në tavolinë, por mendova se Dortmundi ishte vendi i duhur për mua që të zhvillohesha si lojtar i ri”, shpjegoi ai.

Por Isak e kishte të vështirë të adaptohej në dy vjetët e tij në Dortmund, pasi u ndërruan katër trajnerë. Thomas Tuchel, Peter Bosz, Peter Stoger dhe Lucien Favre favorizuan të gjithë sulmuesit e tjerë dhe Isak e gjeti në ekipin e dytë duke luajtur kundër kundërshtarëve të nivelit të katërt. Në fillim të vitit 2019, i dëshpëruar për futbollin e ekipit të parë, u huazua te skuadra holandeze Willem II. Ai e ndihmoi klubin të arrinte në finalen e Kupës së Holandës për herë të parë që nga viti 2005, duke shënuar golin e barazimit dhe më pas penalltinë fituese kundër AZ Alkmaar në gjysmëfinale. Dhe gjatë rrugës ai theu disa rekorde. Ai u bë lojtari i parë që shënoi tre penallti në një ndeshje në Eredivisie, në fitoren 3:2 kundër Fortuna Sittard. Më pas, ai u bë lojtari i parë me origjinë të huaj në Eredivisie që shënoi 12 gola në 12 ndeshjet e tij të para në ligë. Real Sociedad e transferoi nga Dortmundi përpara sezonit 2019/20.

Një tarifë prej dhjetë milionësh ishte e mjaftueshme për t’i bindur gjermanët, ndërsa Isak firmosi kontratë pesëvjeçare me Sociedadin dhe pagë javore prej 20 mijë eurosh. Është në La Liga ku ai ka vazhduar të impresionojë. Në sezonin e tij të parë, Isak pati paraqitje të mira, por në të dytin ishte fantastik me 17 gola në La Liga. U thye edhe një rekord tjetër. Në fitoren 4:0 ndaj Deportivo Alaves, Isak u bë lojtari i parë suedez që shënoi “hat-trick” në La Liga që nga Henry Carlsson që bëri të njëjtën gjë për Atletico Madridin më 1949. Tani që ka bërë kalimin në Premier League, pritet që Isak të thyejë edhe më shumë rekorde. 22-vjeçari me Newcastlen ka firmosur kontratë deri në vitin 2028.