Ottawa, 24 gusht − Gërmimet në provincën kanadeze Saskatchewan kanë rënë në gjurmë të gjetjeve sensacionale që sjellin fakte për gjallesat që kanë jetuar miliona vjet më parë. Bëhet fjalë për fosile gjitarësh që kanë gjëllirë para 23 milionë vjetësh. Thuhet në shkrimin e Aljazeeras, që sot e transmeton Koha Ditore. Arkeologët i kanë zbuluar gjatë gërmimeve në parkun kombëtar Grasslands gjatë një projekti të grupit të arkeologëve të Muzeut të Kanadasë me seli në Ottawa.

Në vitin 2007, arkeologët gjetën për herë të parë në këtë park kombëtar eshtra kali dhe rinoqeronti.

Danielle Fraser, udhëheqëse e grupit të shkencëtareve u ka thënë mediave kanadeze se janë gjetur tri lloje fosilesh të kalit.

“Njëri prej fosileve ka madhësinë e një qeni mesatar. Jemi shumë të ngazëllyer, sepse kemi gjetur edhe fosil maceje të ngjashëm me pumën. Po ashtu, kemi gjetur edhe një asht nofulle që s’ka të bëjë me gjitarë”, ka thënë Fraser. Sipas asaj që kanë konstatuar deri më tani, gjetjet sipas saj janë 23 milionë vjet të vjetra. Kësisoj i takojnë Epokës Miocene.

Froster ka dhënë disa arsye për rëndësinë e gjetjeve nga ekipi i ekspertëve të cilit i ka prirë.

“Vërtet jemi të befasuar që këto fosile i kemi gjetur në Kanada, sepse akullnajat nga Koha e akullit, praktikisht e shtynë të gjitha gjërat në njërën anë. Këso fosilesh në Kanada janë fort të rralla”, ka thënë Fraser. Sipas saj, gërmimet në këtë zonë ende po vazhdojnë.