Ata e quajnë atë Rruga e Jetës, pasi është e vetmja rrugë që lidh 120,000 armenë etnikë që jetojnë në rajonin e Nagorno-Karabakut të Azerbajxhanit me Republikën e Armenisë. Por për gati nëntë muaj, Korridori i Laçinit është bllokuar nga autoritetet e Azerbajxhanit, duke rezultuar në mungesa të mëdha të ushqimit, ilaçeve, produkteve higjienike dhe karburantit në rajonin e shkëputur, raporton BBC.

“Pa vezë, pa sheqer, nuk ka fare ëmbëlsira, buka po racionohet. Jam ngritur në orën 04:00 për të qëndruar në radhë”, thotë një banor.

“Njerëzit qëndrojnë në radhë për orë të tëra për të marrë racione minimale ushqimore. Njerëzve u bien të fikët në radhët e bukës”, thotë gazetarja lokale Irina Hayrapetyan në një mesazh zanor të regjistruar nga brenda enklavës etnike armene.

“Unë di një rast kur një grua shtatzënë humbi fëmijën e saj pasi nuk kishte benzinë për ta çuar në spital”, shtoi një nënë, transmeton klankosova.tv.

“Ne nuk kemi karburant për transport dhe njerëzit duhet të ecin shumë kilometra në këmbë për të qëndruar në radhë për të blerë gjithçka që munden për të ushqyer familjet e tyre”.

Autoritetet lokale në Nagorno-Karabakh thonë se një në tre vdekje ndodhin për shkak të kequshqyerjes.

Organizata e vetme ndërkombëtare humanitare me qasje në Nagorno-Karabakh është Komiteti Ndërkombëtar i Kryqit të Kuq (KNKK).

Këtë muaj, ShBA i bëri thirrje Azerbajxhanit të rivendoste lëvizjen e lirë përgjatë Korridorit të Lachin-it gjatë një takimi urgjent të Këshillit të Sigurimit të OKB-së mbi krizën. Gjykata Ndërkombëtare e Drejtësisë i kishte thënë tashmë Azerbajxhanit se kishte një urdhër ligjërisht të detyrueshëm për të lejuar “lëvizjen e papenguar të personave, automjeteve dhe ngarkesave” në rrugë në të dy drejtimet.

Azerbajxhani mohon se po shpaloset një krizë humanitare, duke thënë se dëshiron kontroll të plotë të territorit dhe ka ofruar një rrugë alternative furnizimi përmes qytetit të Agdamit, të rimarrë gjatë luftës së vitit 2020, raporton BBC, transmeton klankosova.tv.