Policia e Kosovës ka arrestuar personin me inicialet D.M., i cili në rrjete sociale njihet si “Dardi”.

Kjo për shkak se gjatë kohës sa ishte ‘live’ në rrjetin social “Tik Tok”, Dardi kishte lajmëruar rrejshëm policinë duke thënë se i nevojitet ndihmë për shkak se ndihet i kërcënuar nga një person tjetër, shkruan lajmi.net.

Sipas njoftimit të policisë, në konsultim dhe koordinim me prokurorin kompetent, ndaj personit të dyshuar është inicuar rasti lajmërim apo kallëzim i rremë dhe i njëjti është dërguar në qendrën e mbajtjes për 48 orë.

Njoftimi i plotë nga policia:

Policia e Kosovës, si rezultat i angazhimeve dhe hetimeve intensive ka arritur ta identifikojë dhe njëherit ta arrestoi personin e dyshuar (D.M.), i cili ka bërë deklarim të rremë duke kontaktuar Policinë e Kosovës në numër emergjent për kinse nevojë për ndihmë policore dhe pastaj të njëjtat incizime i ka publikuar në Tik Tok, të titulluar (Dardi thirr policin).

Të gjitha hetimet dhe veprimet policore janë ndërmarrë në konsultim dhe koordinim me prokurorin kompetent, ku ndaj personit të dyshuar është iniciuar rasti lajmërim apo kallëzim i rremë dhe i njëjti është dërguar në qendrën e mbajtjes për 48 orë.

Duke parë angazhimet dhe nevojën për veprime policore në ofrimin e ndihmës ndaj qytetarëve që kanë nevojë për prezencë policore, rastet e tilla pengojnë punën policore dhe janë të kundërligjshme, andaj Policia e Kosovës do të ndërmerr masa të menjëhershme ndaj të gjithë personave që mund të përfshihen në raste të tilla.

Policia e Kosovës do të vazhdojë të jetë e përkushtuar në kryerjen e detyrave dhe autorizimeve të saj ligjore dhe kushtetuese si dhe ofrimin e ndihmës dhe sigurisë ndaj të gjithë qytetarëve.

Në vijim keni vido linkun e publikuar https://youtu.be/CxkiU_czZB0