Nënkryetarja e PDK-së, Vlora Çitaku ka reaguar pas deklaratës së fundit nga Qeveria se Kosova ka pranuar diskutime mbi “planin e ri” të BE-së.

Në një postim në Facebook, nënkryetarja Çitaku thotë se Qeveria po shkakton konfuzion, pasi sipas saj fillimisht kanë thënë se kanë pranuar planin, pastaj thonë jo.

Tutje ajo shkruan se Qeveria Kurti është shprehur se nuk ka dialog pa u ndëshkuar Serbia, ndërsa tani thonë ka dialog me Serbinë këtë javë.

“E kemi pranuar planin. Jo nuk e kemi pranuar planin. Nuk ka dialog pa u ndëshkuar Serbia. Ka dialog me Serbinë këtë javë. Ka asociacion. Asociscioni ka vdekur. Ka ska ka ska ka ska. Kakofoni. Konfuzion. Panik”, ka shkruar Çitaku në Facebook.

Zyra e Kryeministrit sot tha se Kurti i është përgjigjur pozitivisht kërkesës së 5 emisarëve për një takim me liderët e Gjermanisë, Francës, Italisë dhe Presidentes së Komisionit Evropian, në margjina të samitit të Këshillit Evropian.

“Kryeministri Kurti i është përgjigjur pozitivisht kërkesës së 5 emisarëve për një takim me liderët e Gjermanisë, Francës, Italisë dhe Presidentes së Komisionit Evropian, në margjina të samitit të Këshillit Evropian. Takimi do jetë në kuptim të diskutimeve të nisura me 5 emisarët gjatë vizitës së tyre në Prishtinë me datën 21 tetor, në të cilin ata propozuan një plan të ri që përfshinte një paketë më të plotë të zbatimit gjithëpërfshirës të Marrëveshjes Bazike bashkërisht me një draft të propozuar për zbatimin e nenit 7. Kryeministri Kurti ka shprehur dakordimin e tij që ky plan i ri të jetë korniza e vazhdimit të diskutimeve të mëtejshme me shtetet aleate, ShBA, Gjermani, Francë dhe Itali, e cila do të duhej të siguronte një komponent të fuqishëm të sigurisë dhe gjithashtu të fuqizonte perspektivën e anëtarësimit në organizata ndërkombëtare. Agjenda dhe detajet e takimit në Bruksel nuk i janë bërë të ditura Kryeministrit Kurti, megjithatë ai shprehet i gatshëm të përfshihet në diskutime përmbajtësore me kushtin që ato të jenë në linjë me parimin e gjithëpërfshirjes”, kanë bërë të ditur Kryeministria.