Administrata Tatimore e Kosovës, ka njoftuar se do të verifikojë mallrat pa origjinë, derisa ka bërë të ditur se secili nga tatimpaguesit duhet të dokumentojë të gjitha mallrat që nga koha e pranimit qoftë nga importimi, blerja, shkëmbimi apo edhe mënyra të tjera, deri a ato të shiten apo të jenë sistemuar.

“Administrata Tatimore e Kosovës, rikujton të gjithë tatimpaguesit se në bazë të Ligjit Nr. 03/L-222 për Administratën Tatimore dhe Procedurat, kërkohet dokumentimi i origjinës së mallit dhe në vazhdimësi do të përqendrohet pikërisht te tatimpaguesit, të cilët posedojnë mallra pa origjinë. Secili tatimpagues duhet të ofrojë dokumentacionin mbështetës, i cili arsyeton prejardhjen e mallit si në vendndodhjen, apo vendndodhjet e tatimpaguesit, ashtu edhe për mallrat në qarkullim jashtë vendndodhjes së tatimpaguesit”, thuhet në njoftim.

Përmes këtij njoftimi, kjo administratë ka inkurajuar të gjithë tatimpaguesit, që t’u përgjigjen detyrimeve tatimore, ngase me kryerjen e tyre, ata kontribuojnë direkt në financimin e programeve qeveritare siç janë: ofrimi i shërbimeve publike, arsimim me standarde të larta, mirëqenies shëndetësore dhe sociale, mbrojtje ligjore dhe siguri, si dhe infrastrukturë të përgjithshme për një mirëqenie më të mirë ekonomike dhe shoqërore.