Agjencia e Ushqimit dhe Veterinarisë ka bërë thirrje për ndalimin e shitjes dhe therjeve ilegale të kafshëve dhe shpezëve.

AUK ka njoftuar se për këtë qëllim është mbajtur takim me Policinë e Kosovës dhe Drejtoria e Inspektoratit të Komunës së Prishtinës.

Kjo agjenci ka paralajmëruar masa të rrepta për ata që shkelin ligjin.

“Agjencia e Ushqimit dhe Veterinarisë, Policia e Kosovës dhe Drejtoria e Inspektoratit të Komunës së Prishtinës, sot mbajtën takim të përbashkët me qëllim forcimin e koordinimit institucional për ndërmarrjen e veprimeve të përbashkëta kundër shitjes dhe therrjeve ilegale jo higjienike dhe të paautorizuara të kafshëve dhe shpezëve, të cilat paraqesin rrezik serioz për shëndetin publik dhe sigurinë ushqimore, me këtë rast, institucionet u dakorduan të intensifikojnë bashkëpunimin dhe të zbatojnë masa të menjëhershme, të koordinuara dhe pa tolerancë ndaj çdo personi apo biznesi që ushtron këtë veprimtari të paligjshme”, është thënë në komunikatën për media të AUK, duke paralajmëruar masa ndaj atyre që nuk e respektojnë ligjin.

“Duke marrë parasysh se këto veprime paraqesin rrezik të drejtpërdrejtë për shëndetin publik, Agjencia e Ushqimit dhe Veterinarisë, Policia e Kosovës dhe Drejtoria e Inspektoratit e Komunës së Prishtinës u bëjnë thirrje publike të gjithë individëve dhe subjekteve ekonomike që merren me shitjen dhe therrjen ilegale të kafshëve dhe shpezëve që t’i ndërpresin menjëherë këto veprimtari. Çdo shkelje do të trajtohet në përputhje me legjislacionin në fuqi dhe ndaj shkelësve do të merren masa të rrepta ligjore. Gjithashtu ftojmë qytetarët që të bashkëpunojnë dhe të raportojnë çdo rast të dyshuar të kësaj veprimtarie ilegale. Institucionet përgjgjegjëse të Kosovës mbesin të përkushtuara në mbrojtjen e shëndetit publik, zbatimin të ligjit dhe garantimin e sigurisë ushqimore”, është thënë në njoftim.