Ndër 12 ambasadorët e liruar nga detyra të mërkurën nga Ministria e Jashtme është edhe ai i Emirateve të Bashkuara Arabe, Avni Arifi.

Për këtë vendim që e kthen në Kosovë, Arifi ka thënë se s’ka fjalë.

“Nuk kam koment për vendimin”, tha shkurt për Klankosova.tv.

Arifi u emërua ambasador më 17 prill të vitit 2019 kur në krye të ekzekutivit ishte Ramush Haradinaj.

Madje, Arifi kishte falënderuar Haradinajn për besimin e dhënë në këtë post, të cilin e konsideroi me rëndësi të posaçme politike dhe ekonomike në atë pjesë të botës.

“Sot kam filluar punën e Ambasadorit të Republikës së Kosovës në Emiratet e Bashkuara Arabe. Përfaqësimi i duhur i Kosovës në këtë pjesë të botës është me rëndësi të posaçme politike dhe ekonomike. Falënderoj të gjithë ata që ma besuan këtë detyrë e në veçanti Kryeministrin Haradinaj. Si gjithmonë do të jem në funksion të detyrës”, kishte shkruar Arifi.

Arifi ka qenë anëtar i AAK-së dhe si i tillë ishte pjesë e Ekipit Negociator që kishte mandatuar Kuvendi i Kosovës në vitin 2018.