Rrjeti i OJQ-ve AVONET, ka akuzuar konsorciumin Bechtel & Enka , për largimin e shqiptarëve nga puna dhe punësimin e rumunëve në vend të tyre.

AVONET, në reagimin dërguar medieve, ka bërë të ditur se gjatë disa monitorimeve, të cilat i kanë bërë kanë kuptuar se kjo kompani së fundmi, është duke bërë largimin e shqiptarëve nga puna duke i zëvendësuar me punësimin e shtetasve rumunë.

“Kjo gjë është mjaft shqetësuese për ne pasi që një gjendje e tillë do të kontribuojë në shtimin e varfërisë, dhe ballafaqimin e qytetarëve tonë me problemin e sigurimit të ekzistencës”, thuhet në këtë reagim.

Më poshtë mund ta lexoni komunikatën e plotë të AVONET-it:

Kosova, është ndër vendet me shkallën më të lart të papunësisë në Evropë. Kjo është edhe ndër shkaqet kryesore që kemi edhe shkallë të lartë të varfërisë. Përkundër këtij fakti që është me papunësinë më të madhe në Evropë, megjithatë, shtetas të huajë Kosovën po e shohin si një vend të përshtatshëm për punë madje edhe duke u punësuar këtu.

Sipas të gjeturave tona duke u bazuar, në të dhëna zyrtare, rreth 1500 shtetas të huaj brenda një viti gjejnë punë në Kosovë, duke mos u bazuar në atë se mijëra të tjerë punojnë ilegalisht.

Një kontribut të tillë, në shtimin e punëtorëve shtetas të huaj, që nga viti 2010 e ka shtuar koncerziumi Bechtel & Enka, e cila ka bërë ndërtimin e Rrugës së Kombit.

Shtetasit e huaj të cilët po kërkojnë punë në Kosovë vijnë, nga shtete të ndryshme, por më së shumti janë nga Rumania, Maqedonia, Turqia, Kroacia, Shqipëria. Por ka edhe nga vende tjera si nga Amerika, Franca, Gjermania, Çekia, nga Ukraina si dhe nga vende tjera.

Ne si AVONET, gjatë disa monitorimeve, të cilat i kemi bërë kemi kuptuar që tashmë kjo kompani së fundmi, është duke bërë largimin e shqiptarëve, nga puna duke e zëvendësuar me punësimin e shtetasve rumun. Kjo gjë është mjaft shqetësuese për ne pasi që një gjendje e tillë do të kontribuojë në shtimin e varfërisë, dhe ballafaqimin e qytetarëve tonë me problemin e sigurimit të ekzistencës.

Në këtë situatë, përveç kompanisë, Bechtel & Enka e cila po bënë punësimin e këtyre shtetasve në mënyrë ilegale, përgjegjësia bie mbi institucionet e Republikës së Kosovës e cila duhet të bëjë pajisjen me leje pune të shtetasve të huaj të cilët duan të punojnë në Kosovë.

Andaj ne bëjmë thirrje që punësimet e tilla ilegale të parandalohen dhe të mos largohen nga puna shtetasit tonë pasi që kjo situatë çdo herë e më shumë do të ndikoj, në shtimin e papunësisë dhe varfërisë njëkohësisht.