Banka Botërore ka disbursuar 200 milionë dollarë për Kolumbinë, në kuadër të reagimit emergjent pas tërmetit të fuqishëm prej 7.4 ballësh që goditi vendin më 10 gusht. Sipas autoriteteve, deri të premten numri i viktimave ka arritur në 285, ndërsa afro 4,000 persona janë plagosur dhe rreth 400 të tjerë vazhdojnë të konsiderohen të zhdukur.

Banka Botërore tha se po bashkëpunon me qeverinë kolumbiane, partnerët zhvillimorë, institucionet financiare dhe sektorin privat për të përmbushur nevojat urgjente të banorëve dhe për të krijuar bazat për rimëkëmbjen e vendit.

Gjithashtu, banka ka nisur Vlerësimin Global të Shpejtë të Dëmeve nga Tërmetet (GRADE), i cili synon t’i ofrojë qeverisë kolumbiane një vlerësim fillestar të dëmeve dhe humbjeve ekonomike.

Ky vlerësim do të ndihmojë autoritetet në përcaktimin e prioriteteve për ndihmën dhe rindërtimin, shkruan Reuters.

Financimi do të orientohet edhe drejt komuniteteve dhe bizneseve të prekura, me mbështetje për shëndetësinë publike, strehimin dhe ndërmarrjet e vogla dhe të mesme.

Tërmeti i 10 gushtit shkaktoi dëme të mëdha në pjesën perëndimore të Kolumbisë, duke shembur ndërtesa banimi dhe duke dëmtuar shtëpi, shkolla e spitale.

Banka Botërore theksoi se mbështetja financiare synon jo vetëm reagimin e menjëhershëm ndaj katastrofës, por edhe procesin e rimëkëmbjes dhe rindërtimit në zonat më të goditura.