Populli rus, por edhe bashkësia ndërkombëtare kërkojnë që të dinë arsyet, theksoi i ngarkuari i BE-së për politikën e jashtme, Joseph Borrell, lidhur me dyshimet për helmimin e kryeopozitarit rus, Alexei Navalny.

Sipas tij, përgjegjësit duhet të dalin para drejtësisë. Hetimet duhet të fillojnë menjëherë dhe të jenë të pavarura dhe transparente.

Gjetja e përgjegjësve

Ashtu si Bashkimi Evropian, edhe kancelarja Merkel e ministri i Jashtëm gjerman, Heiko Maas, kërkojnë nga autoritetet ruse të zbardhin sulmin e mundshëm ndaj Navalynt. Për shkak të rolit të tij të rëndësishëm brenda opozitës ruse, duhet që rasti të zbardhet deri në fund.

“Përgjegjësit duhet të zbulohen dhe të dalin para drejtësisë”, thuhet në deklaratën e përbashkët të Merkelit dhe ministrit të Jashtëm, Maas.

Gjendja e Navalnyt, serioze

Aktivisit i njohur kundër korrupsionit dhe kritiku i ashpër i Putinit u dërgua në një spital rus në Omskun siberian të enjten e kaluar, kjo pasi ai gjatë një fluturimi drejt Moskës pati dridhje të forta dhe pastaj humbi vetëdijen. Rrethi i afërt i Navalnyt është i mendimit, se ai u helmua pasi piu një çaj pak para fluturimit.

Klinika universitare Charite në Berlin, ku po trajtohet kritiku i njohur rus po ashtu mendon për helmim të 44-vjeçarit. Këtë e bëri të ditur një zëdhënëse e klinikës.

Navalny ndodhet ende në koma.

“Gjendja e tij shëndetësore është serioze, por nuk ka rrezik akut për jetën. Rezultatet e kontrolleve mjekësore çojnë drejt konkluzionit për helmim ‘me një substancë nga grupi i frenuesve të kolinesterazës. Navalny po trajtohet me një kundërilaç’. Si do të përfundojë sëmundja është e pasigurt dhe nuk mund të përjashtohen në këtë moment pasojat e vona sidomos në sistemin nervor”, tha zëdhënësja e klinikës në Berlin.

“Gjëra të tilla janë të kreut”

Kreu i komisionit parlamentar të Bundestagut, Norbert Roettgen, CDU, shprehu dyshimin se helmimi me gjasa i Navalnyt mund të jetë porositur nga instancat më të larta.

“Gjëra të tilla janë në dorën e kreut”, tha politikani i CDU-së për televizionin gjerman, ZDF. Sipas tij, me Navalnyn duhet të jepej një shembull si paralajmërim. Koha nuk është rastësi. Qëllimi është që në sfondin e protestave në Bjellorusi të dërgohet një ‘sinjal i qartë’ ndaj opozitës ruse”, tha Roettgen.

Mjekët rusë thonë megjithatë, se Navalny nuk është helmuar.

“Ne e shpëtuam me mundim të madh dhe punë jetën e tij”, tha kreu i klinikës Aleksander Murahovski në Omsk. “Nëse do të kishim gjetur një helm të tillë, që do ishte konfirmuar, do të kishte qenë për ne shumë më e thjeshtë”.

Mjekët e Omskut i hodhën poshtë akuzat, se udhëtimi i Navalnyt në Gjermani u shty për shkak të presionit të autoriteteve ruse.