Presidenti i Shteteve të Bashkuara të Amerikës, Joe Biden, ka arritur të përmbushë vetëm një pjesë të vogël të planit të tij për shpërndarjen e 80 milionë dozave të vaksinave kundër COVID-19, në pjesën tjetër të botës deri në fund të qershorit.

Kjo pasi dolën një mori pengesash, të cilat ngadalësuan ritmin e diplomacisë së vaksinave të SHBA-së.

Administrata e Biden ka njoftuar se rreth 50 vende të botës do të marrin një pjesë të dozave të vaksinës COVID-19, deri tani thuhet se janë shpërndarë 24 milionë doza të vaksinave në dhjetë shtete, raporton Associated Press, transmeton Klankosova.tv.

Nga Shtëpia e Bardhë kanë deklaruar se ditëve në vazhdim do të shpërndahen edhe vaksina të tjera, si dhe thuhet se Biden ka bërë gjithçka për t’u realizuar ky plan i tij.
Shtetet të cilat kanë pranuar vaksina nga SHBA-të deri më sot janë Kolumbia (2.5 milion doza Johnson & Johnson), Bangladeshi (2.5 milion Moderna), Peru (2 milion Pfizer), Pakistan (2.5 milion Moderna), Honduras (1.5 milion Moderna), Brazil (3 milion J&J) , Koreja e Jugut (1 milion J&J), Tajvani (2.5 milion Moderna), Kanada (1 milion Moderna, 1.5 milion AstraZeneca) dhe Meksika (1.35 milion J&J, 2.5 milion AstraZeneca).