Zonja e parë e SHBA-së, Melania Trump, dëshiron që publiku ta kuptojë qartë se projekti i ri filmik i saj nuk është dokumentar klasik.

“Disa e kanë quajtur dokumentar. Nuk është. Është një përvojë kreative që ofron perspektiva, njohuri dhe momente”, ka thënë ajo para një audience të përbërë nga anëtarë të kabinetit, influencues konservatorë dhe figura publike, gjatë premierës në Kennedy Center, tashmë të riemëruar si Trump Kennedy Center, ka raportuar CNN.

Projekti filmik me titull “Melania” vjen pas më shumë se një viti pune dhe shënon një hap të pazakontë: një zonjë e parë në detyrë që përfiton financiarisht nga qasja në jetën e saj private.

Traileri i projektit filmik “Melania”:https://if-cdn.com/llBmgoES?card=small&playerjs=1&consent=0&theme=light&import=0&v=1&app=1

Sipas burimeve të CNN-it, Melania Trump ka nënshkruar një marrëveshje prej 40 milionë dollarësh me Amazon MGM Studios, si dhe një buxhet marketingu prej 35 milionë dollarësh.

E pyetur nga CNN se si e mat suksesin e filmit, ajo ka thënë se nuk e lidh me shikueshmërinë apo fitimet.

“Jam shumë krenare për filmin. Njerëzit mund ta pëlqejnë ose jo, kjo është zgjedhja e tyre. Për mua, ai tashmë është i suksesshëm”, ka thënë ajo në tepihun e kuq, i cili në fakt ishte i zi, sipas vizionit të saj kreativ.

Filmi fokusohet në 20 ditët rreth rikthimit të Donald Trump në Shtëpinë e Bardhë dhe përfshin momente nga përgatitjet për inaugurimin, udhëtimet zyrtare dhe jeta personale e zonjës së parë.

Melania flet edhe për humbjen e nënës së saj, Amalija Knavs, e cila vdiq në muajin janar të vitit 2024, si dhe tregon prapaskenat e zgjedhjes së veshjeve dhe organizimit të ngjarjeve.

Sipas një burimi që e ka parë filmin, Melania Trump ka pasur kontroll të plotë redaktorial si producente ekzekutive.

Në disa skena, presidenti Trump shfaqet duke komentuar me humor, përfshirë një moment kur mëson se do të udhëtojë drejt Kapitolit me paraardhësin e tij, Joe Biden, duke thënë: “Kjo do të jetë interesante”.

Donald Trump ka dhënë edhe vlerësimin e tij për filmin.

“Është shumë i mirë. Glamour, shumë glamur. Na duhet pak glamur”, u shpreh ai para gazetarëve.

Premiera u zhvillua në një ambient të dekoruar plotësisht me emrin dhe imazhin e Melania Trump, ndërsa të pranishëm ishin figura të larta politike dhe publike, përfshirë kryetarin e Dhomës së Përfaqësuesve, Mike Johnson.

“Mendoj se ia vlen investimi. Besoj se do të shpërblehet”, ka thënë Johnson.