Këngëtarja e njohur, Christina Aguilera ka zbuluar se vajza e saj 10-vjeçare, Summer Rain, e pëlqen më së shumti atë kur është natyrale dhe pa grim.

Këngëtarja 44-vjeçare, e cila ka djalin Max Liron, 17 vjeç, me ish-bashkëshortin Jordan Bratman, dhe vajzën Summer Rain me të fejuarin Matthew Rutler, ka thënë se ka filluar të “mësojë nga sytë e tyre”, pasi fëmijët “e shohin çdo anë të saj”.

“Ana e preferuar e Summerit është mami pa grim. Sapo mbaroj xhirimet ose çfarëdo, ajo më thotë: ‘A mund ta heqësh atë? Tani është koha të rehatohesh’”, ka thënë Aguilera në Jennifer Hudson Show, ka raportuar FemaleFirst.

Ajo shtoi se vajza i adhuron edhe nishanet që ajo i ka në fytyrë.

“Ajo i do nishanet e mia dhe unë shpesh i mbuloj, por ajo i adhuron. Më pyet: ‘A do t’i kem edhe unë një ditë?’ Ajo është fansja numër një e mamit”, ka thënë këngëtarja.

Aguilera ka treguar më herët se nuk dëshiron kurrë të duket me “fytyrë të ngrirë”. Edhe pse ka përdorur injeksionin Xeomin për rrudhat në mes të vetullave, ajo thotë se gjithmonë synon pamje natyrale.

“Jam gjithmonë e interesuar të gjej produkte që më emocionojnë dhe më bëjnë të ndihem më së miri. Xeomin më është dukur mënyra më e sigurt sepse nuk ka përbërës shtesë. Të jep siguri, sepse pavarësisht sa e lodhur mund të jem, e di që kam një ndihmë”, pati thënë ajo në vitin 2023 për People.

Ylli ka theksuar se shprehja e fytyrës është shumë e rëndësishme në profesionin e saj.

“Ne duam shprehje, sidomos në punën time. Nuk dua të kem fytyrë të ngrirë. Qoftë në kamerë apo në skenë, duhet të jem autentike me emocionet e mia”, ka thënë ajo.

Aguilera ka qenë gjithmonë “një libër i hapur” për pamjen dhe pasiguritë e saj. E pyetur për qëndrimin ndaj procedurave estetike, ajo i tha revistës Allure se çdo kush duhet të jetë i sinqertë me punën që bën.

“Mendoj se është mirë të ndash dhe të jesh e sinqertë për atë që bën, brenda zonës tënde të rehatisë, sigurisht. Kam qenë gjithmonë e hapur për trupin tim, pamjen time dhe gjëra të tilla. Por jam shumë e rezervuar në shumë aspekte të tjera. Besoj se secili duhet të bëjë atë që është e duhura për të, dhe nuk mendoj se duhet të gjykojmë askënd për këtë”, ka thënë ajo.