Çmimet e naftës mbeten të larta pasi Irani tha se një marrëveshje e afërt me Omanin për menaxhimin e Ngushticës së Hormuzit nuk do të mjaftonte për rihapjen e kësaj rruge ujore jetike, ndërsa kërkoi që Shtetet e Bashkuara të përmbushin një sërë kushtesh, raporton CNN.

Nafta Brent, standardi global i naftës, u rrit me 0.6%, në 84.03 dollarë për fuçi. WTI, standardi amerikan, u rrit lehtë me 0.4%, në 78.49 dollarë për fuçi.

Irani kërkon që SHBA-ja të ndalojë sulmet dhe t’i japë fund bllokadës ndaj porteve iraniane, si dhe të heqë sanksionet, të zhbllokojë asetet iraniane dhe të paguajë kompensim për dëmet e shkaktuara nga lufta.

Lista e kërkesave nuk ndryshon në mënyrë thelbësore nga ato të paraqitura në memorandumin e mirëkuptimit, të cilin SHBA-ja dhe Irani e nënshkruan në qershor. Por toni sugjeron se Teherani mund të jetë duke mbajtur një qëndrim më të ashpër, gjë që mund të vonojë më tej rikthimin e plotë të kalimit të anijeve përmes Ngushticës së Hormuzit, nëpër të cilën kalonte një e pesta e furnizimit global me naftë para luftës.

Në të njëjtën kohë, eksportet e naftës së Arabisë Saudite përmes Detit të Kuq dhe ngushticës Bab el-Mandeb kërcënohen nga sulmet e grupit të milicisë Huthi, të mbështetur nga Irani, ndaj anijeve në këtë korridor detar, i cili është bërë një alternativë thelbësore ndaj Hormuzit.

Rebelët Huthi gjithashtu shënjestruan një rafineri të madhe saudite të naftës në bregdetin e Detit të Kuq të dielën.

Disa të dhëna: Çmimet e naftës kanë qenë shumë të paqëndrueshme javët e fundit, mes marrëveshjeve që herë avancojnë e herë dështojnë për rihapjen e ngushticës. Në fillim të korrikut, nafta Brent ra në nivelet e fundit të regjistruara para luftës, pranë 70 dollarëve për fuçi, për t’u rikthyer vetëm disa javë më vonë mbi 100 dollarë për fuçi.