Klubi amerikan D.C United dëshiron ta sigurojë transferimin e mesfushorit të Real Madridit, Luka Modricit, në mënyrë që ta zëvendësojë Wayne Rooneyn, që tani është kthyer në Angli.

Mediumi The Athletic raporton se transferimi i Luka Modricit drejt SHBA-së nuk do të jetë i mundur gjatë këtij muaji, pasi që kërkesat e kroatit për pagë janë të papërballueshme për klubin amerikan, transmeton Gazeta Express.

Megjithatë, interesimi i D.C Unitedit për Modricit është intensifikuar gjatë javëve të fundit, shkaku i largimit të Wayne Rooneyt, i cili u kthye në Angli pas 18 muajve në Major League Soccer, ligën e nivelit të parë të futbollit në SHBA.

Në anën tjetër, Zinedine Zidane dhe drejtuesit e Real Madridit do të tentojnë ta bindin Modricin të mos largohet para se t’i përfundojë kontrata më 2021, përkundër që kroati nuk është më i pazëvendësueshëm në mesfushën e “Los Blancos”.

Përkundër problemeve me lëndime që i ka pasur këtë sezon, 34-vjeçari ka luajtur në 18 ndeshje, duke kontribuar në to me katër gola dhe pesë asiste.