Ministri i Jashtëm i Serbisë, Ivica Daçiq konfirmoi mbrëmë gjatë një interviste për TV Pink të Beogradit, tha se Togo është vendi i 15 që ka tërhequr njohjen e pavarësisë së Kosovës. Ai me këtë rast prezantoi notën e këtij vendi, dërguar Beogradit.

Ai këtë njoftim e kishte bërë ditë më parë, pas thirrjes së Quintit për vazhdimin e dialogut, por që ky, siç ishte shprehur, nuk deshi të prishë shijen e thirrjes së këtyre shteteve.

Daçiq, siç e citojnë mediat serbe, tha se qëllimi i Serbisë është që numri i shteteve që kanë njohur Kosovën të jetë më i vogël se gjysma e vendeve anëtare të Kombeve të Bashkuara, përkatësisht më pak se 97. “Në këtë mënyrë ato nuk mund të sillen siç t’ua dojë qejfi. Ajo nuk mund të bëhet anëtare e OKB meqë Rusia do të përdor veton në Këshillin e Sigurimit”, citojnë mediat Daçiqin.

Nga Ministria e Jashtme e Kosovës ende nuk ka pasur ndonjë reagim në lidhje me këtë vendim të Togos, siç e ka prezantuar ministri serb i Jashtëm, Daçiq.