Më shumë se 50 sulme të koordinuara me zjarrvënie dhe mjete ndezëse, të cilat dyshohet se kishin për qëllim krijimin e trazirave, janë kryer në jug të Tajlandës, njoftuan autoritetet ushtarake.

Nga sulmet, të ndodhura në provincat jugore pranë kufirit, dy persona mbetën të plagosur. Në shënjestër të autorëve ishin një ndërtesë e administratës lokale, një dyqan i vogël dhe një automjet i vjedhur, të cilat u përfshinë nga flakët.

Incidentet ndodhën të shtunën në mbrëmje, nga ora 20:00 deri në mesnatë, sipas një deklarate të Komandës së Operacioneve për Sigurinë e Brendshme të ushtrisë tajlandeze.

Shumica e sulmeve u raportuan në provincën Narathiwat, ndërsa raste të tjera u regjistruan në provincat fqinje Yala dhe Pattani, shkruan BBC, transmeton Klankosova.tv.

Sipas gazetës Bangkok Post, dy gra u plagosën pasi një bombë shpërtheu në distriktin Muang, në Narathiwat.

Në disa zona u dogjën edhe kulla të telekomunikacionit, ndërsa autoritetet e sigurisë u bënë thirrje banorëve të mos preknin objekte të dyshimta.

Për shkak të situatës, autoritetet vendosën një shtetrrethim gjatë natës në provincën Narathiwat, i cili u hoq të dielën në mëngjes.

Deri të dielën nuk ishin raportuar sulme të tjera.

Jugu i Tajlandës, veçanërisht provincat Narathiwat, Yala dhe Pattani, është përballur prej vitesh me një kryengritje të armatosur dhe sulme të herëpashershme nga grupe separatiste.