Zyrtarë të Dhomës së Tregtisë dhe Industrisë së Kosovës (DHTIK) kanë njoftuar që sipas tyre gjendjen e rënduar në të cilën janë futur shumë biznese, si pasojë e bllokadës së krijuar nga Ligji për Pronën Publike. Këto komente u bënë gjatë një punëtorie njëditore për mbështetjen e Zyrës për Administrimin e Pronës Publike në zbatimin e këtij ligji.

Drejtori i DHTIK-së, Kushtrim Ahmeti, tha se ndikimi i kësaj bllokade ka prekur rëndë ekonominë dhe ka dëmtuar edhe investitorët e huaj.

“Pos bizneseve vendëse, edhe investitorët e jashtëm janë prekur nga kjo bllokadë, duke rrezikuar vendin të përfundojë në procese arbitrazhi e gjithashtu edhe në krijimin e një pasqyre tejet negative për investimet e jashtme,” u shpreh Ahmeti.

Në punëtori morën pjesë edhe anëtari i Bordit të Dhomës, Idriz Zejnullahu, si dhe konsulenti i DHTIK-së, prof. Mazllum Baraliu, të cilët paraqitën një listë të gjerë të shkeljeve ligjore dhe dëmeve ekonomike që, sipas tyre, kanë prekur qindra biznese në vend.

Zyrtarët e Dhomës theksuan se situata institucionale në vend ka ndikuar që problemet të thellohen edhe më shumë.

“Kriza e gjatë institucionale vetëm sa ka thelluar telashet e bizneseve, duke ulur kapacitetet e punës, duke rrezikuar numër të madh të punëtorëve dhe duke kontribuar që të rritet me shpejtësi importi i zhavorrit nga Serbia dhe Maqedonia e Veriut,” është thënë në komunikatë.

Sipas DHTIK-së, një tjetër pasojë serioze është edhe pamundësia e shumë kompanive për të realizuar investime dhe bashkëinvestime me partnerë të huaj, sidomos në projektet për kapacitete të reja energjetike, të cilat janë jetike për nevojat aktuale të Kosovës.