(Poezi nga Fatbardha Xhani Myslimaj)

Ah, dashuri!
Përthyhesh në tjerë sy
Përndizesh në tjera faqe
Lëvrin në tjerë damarë
Ftohesh në tjera buzë
Shijon në tjetër qiellzë
Lëmohesh në tjetër lëkurë,

Aromohesh
Në tjera lule
Rrjedh e pikon
Në tjera petale
Lakohesh në tjetër lumë
Mërmërin në tjera muzgje
Shëtit në tjerë qiej
Shuhesh në tjera yje
Rindizesh në tjerë zjarre
Rilind në tjera mengjese!

Ah, dashuri!
Dua të të kërkoj
Dua të të gjej
Siç ti më ke gjetur mua:
Diku tjetër!