Për nëntë ditë me radhë qyteti i Prizrenit u bë destinacion për të gjithë ata që deshën ta shohin një version të së ardhmes, apo të paktën të gjejnë shpresë për një të nesërme më të mirë.

Rreth 15 mijë veta, nga vende të ndryshme të botës, u mblodhën në Prizren, në edicionin XVI të festivalit ndërkombëtar të filmit dokumentar dhe të shkurtër “DokuFest”.

Përmes projeksioneve filmike, paneleve e masterklasave u projektua e tashmja, por gjithmonë me mesazhe për një të ardhme më të mirë. Edicionin e sivjetmë të “DokuFestit” organizatorët e kanë konsideruar madhështor, ndërsa pjesëmarrësit e kanë përshkruar atë si një prej festivaleve më të mira në Evropë.

Ngjarja më e madhe e filmit në vend, që nisi më datën 4 të muajit gusht, u përmbyll të shtunën mbrëma me ndarjen e çmimeve. “Buffet Zeljezara”, nga regjisori kroat Goran Deviq, mori çmimin kryesor, për dokumentarin më të mirë në garën “Ballkan Dox”, shkruan “Koha Ditore”.