Ish-presidenti amerikan Donald Trump ka akuzuar ish-këshilltaren e tij për COVID-19, Dr. Deborah Birx si një “gënjeshtare e provuar” pasi ajo pretendoi se administrata e tij censuronte mesazhet e saj gjatë pandemisë.

Sipas Newsweek, përcjell Telegrafi, Trump i bëri vërejtjet në një deklaratë të hënën duke kundërshtuar Birx, po ashtu edhe Dr. Anthony Fauci, ekspertët kryesorë të Task Forcës së tij të Shtëpisë së Bardhë për Coronavirus, për komentet e fundit që ata kishin bërë në media.

Ish presidenti i quajti mjekët “vetë-promovues” një ditë pasi intervistave, në të cilat Birx kishte thënë se Shtëpia e Bardhë e Trump e kishte detyruar atë të censuronte rekomandimet e saj gjatë pandemisë.

“Dr. Birx është një gënjeshtare e provuar me shumë pak besueshmëri të mbetur”, citohet të ketë thënë Trump. “Shumë nga rekomandimet e saj u konsideruan si ‘pseudo-shkencë’ dhe Dr. Fauci gjithashtu do të fliste negativisht për të dhe, në fakt, do të kërkonte të mos ishte në të njëjtën dhomë me të. Shtetet që ndoqën shembullin e saj, si Kalifornia, kishin rezultate më të këqija në rastet me Covid-19 dhe shkatërroi jetën e fëmijëve të panumërt sepse ata nuk mund të ktheheshin në shkollë, shkatërruan shumë biznese dhe një numër të patreguar amerikanësh që u vranë nga vetë bllokimet”.

“Dr. Birx ishte një këshilltare e tmerrshme mjekësore, prandaj unë rrallë ndiqja këshillat e saj”, shtoi Trump.

Ndryshe, ish-koordinatorja e forcës së posaçme të coronavirusit e SHBA-së kishte thënë edhe se shumë vdekje mund të ishin parandaluar, nëse Trump do të vepronte më shpejt