Gianluigi Donnarumma ka thënë se është transferuar te Paris Saint-Germaini për të luajtur dhe ka treguar se bisedon shpesh me trajnerin e Milanit, Stefano Pioli, duke shtuar se do jetë gjithmonë tifoz i Rossonerëve.

Portieri italian po kthehet në San Siro me kombëtaren për ndeshjen gjysmëfinale të Kupës së Kombeve kundër Spanjës.

“Milani është një pjesë e rëndësishme e jetës time. Jam i emocionuar (për kthimin në San Siro)”.

“Jam në Paris për të luajtur, është normale në fillim. Jam atje për të luajtur dhe jam i sigurt se gjithçka do të shkojë mirë; nuk kam probleme sa i përket ekipit kombëtar. Po vazhdoj përpara rrugëtimin tim dhe shpresoj që gjithçka të shkojë mirë”.

“Jam i kënaqur për situatën në të cilën gjendet Milani, unë do të jem gjithmonë një tifoz i Milanit. Jam i kënaqur për Piolin, flas shpesh me të”, ka theksuar 22-vjeçari në një konferencë për shtyp. /Telegrafi