Drenica është mbuluar nga uji.

Vërshimet kanë përfshirë shumë fshatra të saj. Një numër i madh i banorëve mbetën pa strehë, por edhe pa gjëra elementare.

Rrezikohet të shfaqet edhe një epidemi e mundshme.

Politikanë dhe personalitete të tjera po shfrytëzojnë rastin për të bërë gjoja bamirësi në këtë rajon.

Por, në fakt, ata nuk po ndihmojnë Drenicën, por po e ofendojnë popullin e saj. Drenica nuk ka nevojë për ndihmën e asnjë qytetari, por për dorën e shtetit.

Në buxhetin e Kosovës janë të pa shpenzuara mbi 700 milionë euro. Nëse shteti do të intervenonte në këtë rajon, atëherë do të ishte një ndihmë e vërtetë për popullsinë e Drenicës.

Është i tmerrshëm trendi i deklaratave, poezive e folklorizmave të tjera rreth kësaj teme, në kurriz të njerëzve të varfër.

Populli i Drenicës mund të ketë edhe të varfër, por ata janë krenarë, nuk kanë nevojë për lëmoshën e askujt.

Turp për disa që fotografojnë veten me familje të varfra me ushqime të minimarketeve, me arsyetimin se gjoja po bëjnë bamirësi.

Kjo është një maskaradë e turpshme që nuk ndihmon në asgjë.

Në këtë maskaradë, po marrin pjesë edhe analistët e studiove televizive, por edhe personalitete të tjera si pronarë të gazetave e portaleve.

Ata po shfrytëzojnë situatën për të fituar popullaritet, duke shpërfillur nevojat e vërteta të popullsisë.

Ikni prej aty.

Drenica krenare nuk ka nevojë për ju.

Presioni duhet të bëhet te qeveria, në mënyrë që aty të shpërfaqet dora e shtetit.

E jo dora e hajgarexhinjve të rrjeteve sociale.

(Autori është ish-deputet i AAK-së dhe anëtar i Kryesisë së kësaj partie)