Në mjediset e Muzeut Arkeologjik në Prizren, të hënën në mbrëmje, u hap ekspozita e fotografive “Unë jam shqiptar” me protagonistë shqiptarët nëpër botë që nga koha e Skënderbeut e deri në ditët e sotme.

Ekspozitën e hapi arkeologu Vesel Hoxhaj, i cili tregoi se ekspozita “Unë jam shqiptar” është aktivitet në kuadër të Kalendarit të përbashkët kulturor ndërmjet Ministrisë së Kulturës, Rinisë dhe Sportit të Republikës së Kosovës dhe Ministrisë së Kulturës Shqipërisë.

Në emër të Ministrisë së Kulturës, të pranishmit i përshëndeti Samir Hoxha, shef i kabinetit të ministrit Kujtim Gashi. Ai tha se kjo ekspozitë që hapet sot në Prizren, shënon një ndër shumë aktivitetet të cilat janë zhvilluar nga Qeveria e Republikës së Kosovës në vitin mbarëkombëtar, kushtuar 550-vjetorit të vdekjes së heroit tonë kombëtar Gjergj Kastrioti – Skënderbeu.

“Ekspozita që po hapet sot në Prizren është një kontribut i çmuar i dy institucioneve të Kulturës dhe Trashëgimisë Kulturore në të dyja anët e kufirit, në lartësimin e figurave të rëndësishme historike por edhe atyre të kulturës, artit, letërsisë, sportit dhe personaliteteve të tjera kombëtare që emigruan shekuj më parë në vende të ndryshme të botës. Përkundër këtij fakti ata në asnjë moment nuk e harruan vendin e origjinës, kombin dhe vendin e tyre dhe në çdo rast e potencuan faktin dhe lartësuan identitetin e tyre kombëtar duke thënë: ‘Unë jam shqiptar’”, u shpreh Hoxha.

“Duke u frymëzuar nga ky fakt”, shtoi më tej Hoxha, “ky le të jetë si shembull i mirë që secili nga ne të japë kontributin e tij për ndriçimin e historisë sonë të pasur dhe personazheve që e kanë bërë këtë histori”.

Samir Hoxha, me këtë rast gjithashtu e potencoi faktin e fuqizimit të aktiviteteve të përbashkëta me Republikën e Shqipërisë dhe ky fuqizim po ndodh tha ai “falë përkushtimit dhe punës së palodhshme të punonjësve profesional të institucioneve nga të dy vendet tona”.

Hoxha gjithashtu tha se përkushtim i Ministrisë është edhe organizimi i aktiviteteve të mos ndodh vetëm në kryeqytet por ato të barten edhe në qytetet e Kosovës, dhe sidomos në Prizren.

“Brenda pak ditëve në Prizren do të bartet një pjesë e Ministrisë së Kulturës dhe veç qytet universitar, Prizreni po bëhet edhe qytet i institucioneve të republikës së Kosovës” tha Hoxha.

Ai me këtë rast edhe një herë e rikonfirmoi përkrahjen e plotë të Ministrisë, që aktivitete të tilla dhe projekte të përbashkëta ndërmjet institucioneve tona të konsolidohen edhe më tutje, të zgjerohen dhe të strukturohen ende më shumë brenda fushë veprimtarisë së institucioneve tona.

Profesori Agim Zogaj e përgëzoi organizatorin për ekspozitën dhe për emërtimin që e mban ky aktivitet.