I dyshuari Faik Shaqiri që është ekstraduar gjatë ditës së djeshme nga Gjermania e që akuzohet për vrasjen e rëndë të dy zyrtarëve të UNMIK-ut dhe për tentim vrasjen e rëndë të dy zyrtarëve të tjerë të UNMIK-ut në vitin 2004 është paraqitur në seancën  e Gjykatës Themelore në Prishtinë ku pritet caktimi i masës së sigurisë ndaj tij.

Bashkë me Shaqirin, në këtë seancë janë paraqitur edhe dy të dyshuarit e tjerë që janë arrestuar gjatë ditës së djeshme pas një operacion kërkimi si pjesë e hetimeve penale në vazhdim nga Prokuroria Speciale të kryer nga Policia e EULEX-it dhe Policia e Kosovës, njofton Klan Kosova.

Rreth 35 zyrtarë policorë ndërkombëtarë dhe 100 zyrtarë policorë nga Kosova bënë kërkime në lokacione të ndryshme në lidhje me shtatë të dyshuar pjesë e hetimeve penale në vazhdim e sipër.

Rasti është duke u hetuar dhe bashkërenduar nga një prokuror ndërkombëtar i Prokurorisë Speciale të Republikës së Kosovës.

Urdhrat për arrestimet dhe kërkimet janë dhënë nga një gjyqtar i Kosovës për procedurë paraprake.