Agjencia Evropiane e Policisë, Europol, ka zhvilluar një operacion të gjerë ndërkombëtar kundër propagandës online të Korpusit të Gardës Revolucionare Islamike të Iranit (IRGC), duke shënjestruar mijëra postime dhe rrjete digjitale të lidhura me këtë organizatë, e cila konsiderohet terroriste nga Shtetet e Bashkuara, Bashkimi Evropian dhe disa shtete të tjera, përfshirë Kosovën.

Sipas njoftimit të EUROPOL-it, gjatë aksionit janë identifikuar mbi 14.200 postime të lidhura me Gardën Revolucionare, të cilat përdoreshin për përhapje propagande, rekrutim mbështetësish dhe mbledhje fondesh përmes internetit.

Operacioni u zhvillua nga 13 shkurti deri më 28 prill dhe përfshiu autoritetet e 19 shteteve, të cilat bashkëpunuan në identifikimin e përmbajtjes terroriste në platforma të ndryshme online. Hetuesit analizuan rrjete sociale, shërbime transmetimi, blogje dhe ueb-faqe të pavarura që shpërndanin materiale të lidhura me IRGC-në.

Sipas EUROPOL-it, propaganda është publikuar në disa gjuhë, përfshirë arabisht, anglisht, frëngjisht, persisht dhe spanjisht. Përmbajtja përfshinte fjalime me narrativë fetare dhe politike, si dhe video të krijuara me inteligjencë artificiale që lavdëronin Gardën Revolucionare dhe bënin thirrje për hakmarrje pas vrasjes së liderit suprem iranian, Ali Khamenei.

EUROPOL bëri të ditur se llogaria e IRGC-së në platformën X, e cila kishte rreth 150 mijë ndjekës, është bllokuar në territorin e Bashkimit Evropian, ndërsa lidhje dhe platforma të tjera të ndërlidhura janë hequr ose vazhdojnë të hetohen.

Hetimet zbuluan gjithashtu se Garda Revolucionare ka ndërtuar rrjete të gjera digjitale në vende të ndryshme, përfshirë Rusinë dhe Shtetet e Bashkuara, për të zgjeruar praninë e saj online dhe për të shmangur kufizimet ndërkombëtare.

Autoritetet identifikuan edhe përdorimin e kriptovalutave për financimin dhe amplifikimin e operacioneve propaganduese në internet, një metodë që, sipas EUROPOL-it, synon të shmangë sistemet tradicionale të kontrollit financiar.

Korpusi i Gardës Revolucionare Islamike u themelua pas revolucionit iranian të vitit 1979 dhe konsiderohet krahu ideologjik dhe ushtarak i regjimit iranian. Përveç rolit ushtarak, Garda ka ndikim të madh edhe në ekonominë iraniane, duke kontrolluar kompani dhe sektorë strategjikë në vend.