Në një intervistë për “Der Spiegel”, Dr. Anthony Fauci, këshilltar mbi pandeminë i presidentit amerikan Donald Trump, flet mbi zemërimin e kundërshtarëve të tij, marrëdhënien e tij të vështirë me shefin e Shtëpisë së Bardhë, gabimet e bëra nga SHBA-ja gjatë përpjekjes për të frenuar përhapjen e Covid -19, dhe optimizmin e tij të kujdesshëm se një vaksinë do të jetë së shpejti në dispozicion.

Der Spiegel: Ju e këshilluat administratën Trump në vitin 2017 të rriste gatishmërinë e saj për një pandemi të mundshme. A e kishit parashikuar një skenar të tillë, me karantina në mbarë botën, spitale të tejmbushura, dhe një përçarje sociale mjaft të dhunshme?

Fauci: Unë parashikova shfaqjen e një sëmundjeje të re infektive, pasi kemi pasur shumë prej tyre. Gjatë detyrës sime si drejtor i Institutit të Sëmundjeve Infektive prej 36 vjetësh kam përjetuar epideminë e HIV, gripat pandemikë, Ebolën dhe Zikën.

Dhe e kam ditur gjithmonë se do të kishim sfidën e pashmangshme e të përhershme të shpërthimeve epidemike në të ardhmen. Pandemia aktuale është e përmasave historike. Është gjëja më e keqe që kemi parë në 102 vjetët e fundit, që nga viti 1918.

Der Spiegel: Si studiues i SIDA-s, mendoni se koronavirusi është më i keq se HIV?

Fauci: SIDA është një sëmundje krejtësisht e ndryshme. Arsyeja pse pandemia e koronavirusit është kaq unike, është pasi ajo u përhap në mbarë botën. Dhe duket se të gjithë janë të prekshëm prej saj. Në 7-8 muajt e fundit, koronavirusi ka paralizuar botën, ka shkatërruar ekonomitë.

Der Spiegel: Me mbi 5.5 milionë raste dhe më shumë se 180.000 të vdekur, Shtetet e Bashkuara janë vendi më i prekur në botë. Cilat janë sipas jush arsyet kryesore pse gjërat shkuan kaq keq në SHBA?

Fauci:: SHBA-ja është një vend shumë i madh, dhe tepër i larmishëm. Kjo është një nga pikat tona të forta. Por në një epidemi, është një nga dobësitë tona. Ne patëm valë të ndryshme infektimi, dhe rastet nuk ishin kurrë në një nivel fillestar të ulët si në Gjermani apo Itali. Ne e nisëm me 20.000 raste në ditë.

Ne këshilluam rihapjen e kujdesshme të ekonomisë. Disa shtete i dëgjuan udhëzimet tona, dhe vepruan në mënyrë të arsyeshme. Por disa shtete i injoruan, dhe qytetarët aty vepruan si deshën. Dhe për këtë arsye pati 40.000, 50.000, 60.000 dhe madje 70.000 raste të reja në ditë në ditë.

Der Spiegel: A nuk ndiheni realisht të pafuqishëm kur shihni situatën aktuale në SHBA? Nuk demoralizoheni?

Fauci: Jo unë nuk ndihem kurrë i pafuqishëm. I pafuqishëm do të thotë që nuk ka mundësi të bësh dot asgjë. Por në fakt ka shumëçka që mund të bëhet. Nuk zhytem as në dëshpërim. Unë jam shkencëtar dhe një zyrtar i shëndetit publik. Nuk kam një reagim emocional ndaj një epidemie. Jam një optimist i kujdesshëm, një njeri realist.