Klubi i futbollit Drita dhe tifozët e tij, “Intelektualët”, kanë bërë plane të mëdha për ndeshjen hapëse të edicionit 2018/2019 kundër KEK-ut, që luhet të dielën në stadiumin e qytetit në Gjilan. Skuadra kampione dhe tifozët e saj paralajmëruan të premten hapjen e kampionatit me ceremoni festive, duke prezantuar para shikuesve trofetë e fituar në edicionin e kaluar.

Paralajmëruan edhe mbledhje të mjeteve financiare për t’i ndihmuar njerëzit në nevojë në prag të festës së Kurban Bajramit. Por po të premten këto plane ranë në ujë, si rrjedhojë e veprimeve të mëhershme të “Intelektualëve”, shkruan sot Koha Ditore.

Ishte Komisioni Disiplinor i FFK-së që të njëjtën ditë kur u paralajmërua festa, mori vendim për ta dënuar Dritën që të luajë dy ndeshjet e radhës si vendëse pa shikues dhe po ashtu për ta gjobitur me 10 mijë euro. Kjo bëri që të anulohen të gjitha planet që kishte klubi gjilanas me shumë shikues.