FIFA ka reaguar pas akuzave të forta se Kupa e Botës 2026 po “drejtohet” në favor të Argjentinës, pas fitores së diskutueshme të kampionëve në fuqi ndaj Egjiptit në 1/8 e finales.

Argjentina arriti një përmbysje dramatike në Atlanta, duke fituar 3-2 pasi ishte në disavantazh 2-0. Golat e Cristian Romeros, Lionel Messit dhe Enzo Fernandezit e dërguan skuadrën e Lionel Scalonit në çerekfinale, por ndeshja u shoqërua me polemika të mëdha.

Stoli i Egjiptit reagoi ashpër ndaj disa vendimeve të arbitrave, të cilat sipas tyre ndikuan drejtpërdrejt në rezultatin final.

Federata Egjiptiane e Futbollit publikoi një deklaratë të ashpër, ku kërkoi nga FIFA largimin e gjyqtarit kryesor dhe të gjithë ekipit të arbitrave nga pjesa e mbetur e Botërorit. Sipas tyre, zyrtarët e ndeshjes kishin bërë “gabime flagrante” dhe kishin refuzuar të rishikonin disa pamje vendimtare.

Një nga momentet më të diskutuara ishte goli i anuluar i Mostafa Zikos. Rrjeta u anulua pas ndërhyrjes së VAR-it, i cili identifikoi një faull ndaj Lisandro Martinezit në nisje të aksionit.

Egjipti gjithashtu pretendoi për penallti në minutat shtesë, duke argumentuar se Mohamed Salah ishte faulluar nga Julian Alvarez në zonë, pak para golit të fitores së shënuar nga Enzo Fernandez në minutën e 93-të.

Këto episode nxitën akuza të shumta në rrjete sociale dhe në media, ku disa tifozë e analistë ngritën pretendime se turneu po favorizon Argjentinën për ta çuar drejt titullit të katërt botëror.

Pas këtyre reagimeve, shefi i arbitrimit në FIFA, Pierluigi Collina, doli me një deklaratë publike, duke i hedhur poshtë akuzat si të pabaza.

“Diskutimet konstruktive për vendimet janë gjithmonë pjesë e futbollit, por akuzat e pabaza nuk kanë vend në sportin tonë. Askush nuk mund ta vërë në dyshim integritetin e zyrtarëve të ndeshjeve të Kupës së Botës. Kur ndodh kjo, mund të provokojë reagime që çojnë deri te kërcënime ndaj tyre dhe familjeve të tyre. Kjo nuk është e drejtë”, deklaroi Collina.

Ai theksoi se sektori i arbitrimit në FIFA punon në mënyrë të pavarur dhe nuk ndikohet nga askush, madje as nga presidenti i FIFA-s, Gianni Infantino.

“Askush nuk mund të pretendojë se arbitrimi i FIFA-s mund të ndikohet nga dikush. Zyrtarët e ndeshjeve marrin vendime të ndershme dhe, ashtu si lojtarët e trajnerët, përpiqen gjithmonë të bëjnë më të mirën”, shtoi ai.

Collina u ndal edhe te dy incidentet kryesore që zemëruan Egjiptin.

Sipas tij, pas çdo goli, VAR-i kontrollon fazën sulmuese që çon deri te rrjeta. Nëse gjatë ndërtimit të aksionit identifikohet një faull që ka ndikuar në gol, atëherë VAR-i mund t’i rekomandojë gjyqtarit rishikim në monitor.

Ai shpjegoi se në rastin e golit të anuluar të Egjiptit, Marwan Attia shkeli qartë në këmbën e Lisandro Martinezit, gjë që sipas FIFA-s përbënte faull.

“Një faull është faull. Nuk ka rëndësi nëse duket i qartë apo jo; nëse gjyqtari nuk e ka parë në fushë, VAR-i mund të ndërhyjë”, tha Collina.

Sa i përket pretendimit për penallti ndaj Mohamed Salah, Collina shpjegoi se arbitri dhe VAR-i e konsideruan kontaktin me Julian Alvarez si kontakt normal futbollistik.

Sipas tij, në atë rast mbrojtësi preku fillimisht topin dhe më pas pati kontakt të zakonshëm me kundërshtarin, çka nuk përbën faull.

“Sigurisht, gjithmonë do të ketë një element subjektiv në disa vendime, por jemi të kënaqur me mënyrën se si ky parim është zbatuar gjatë gjithë turneut”, përfundoi Collina.

Argjentina tani do të përballet me Zvicrën në çerekfinale të dielën, ndërsa fituesi i kësaj ndeshjeje do të luajë në gjysmëfinale ndaj fituesit të çiftit Angli – Norvegji, më 15 korrik.

Polemikat, megjithatë, duket se nuk do të shuhen lehtë. FIFA e ka mbrojtur publikisht arbitrimin, por zemërimi i Egjiptit dhe akuzat për favorizim të Argjentinës kanë hapur një debat të madh mbi VAR-in, transparencën dhe besimin te vendimet në Botëror.