Aktivistja kosovare e medieve, Dr. Flutura Kusari është nderuar nga presidenti Federal Gjerman Frank-Walter Steinmeier me Urdhrin e Meritës së Republikës Federale të Gjermanisë në klasën e Kryqit të Meritave.
Ky nder i bëhet Kusarit si mirënjohje për kontributin e saj të jashtëzakonshëm për lirinë e mediave, demokracinë dhe shoqërinë civile në Kosovë dhe më gjerë. Shenjat e Urdhrit i janë dorëzuar Dr. Kusarit nga ambasadorja Rohde sot në rezidencën e ambasadorit në Prishtinë, bën të ditur Ambasada e Gjermanisë, në një njoftim për medie.
Ceremonia u përshëndet nga ish-presidentja Atifete Jahjaga, deputetja e Parlamentit Evropian Viola von Cramon dhe një gamë e gjerë personalitetesh kosovare duke përfshirë deputetë dhe shoqëri civile.
Kusari është shtetasja e parë kosovare që merr Urdhrin e Meritës të Republikës Federale të Gjermanisë.
“Dr. Flutura Kusari njihet gjerësisht si një nga aktivistet më me ndikim të politikave mediatike në Kosovë, duke u vendosur si një figurë udhëheqëse në shoqërinë civile. Gjatë gjithë përpjekjeve të saj, ajo ka mbrojtur promovimin e lirisë së shprehjes dhe medias si parakushte themelore për zhvillimin demokratik në rajon dhe integrimin e tij në Bashkimin Evropian”, theksohet në njoftim.
“Mbrojtja e saj e palodhshme përfshin mbrojtjen e lirisë së shtypit nga ndërhyrjet politike, sulmet verbale dhe fizike ndaj gazetarëve dhe rastet e Padive Strategjike kundër Pjesëmarrjes Publike (SLAPP). Kritikat konstruktive dhe qasja proaktive e Dr. Kusarit i kanë dhënë asaj reputacionin e të qenit një forcë shtytëse për llogaridhënie brenda qeverisë”.
“Duke punuar për Qendrën Evropiane për Lirinë e Shtypit dhe Medias ndërmjet Prishtinës dhe Lajpcigut, Dr. Kusari ka kultivuar rrjete të gjera në Kosovë, Gjermani dhe në mbarë Evropën. Nëpërmjet projekteve të saj, ajo vazhdimisht rrit ndërgjegjësimin publik dhe politik në lidhje me çështjet e shtypit dhe medias, duke formësuar në mënyrë aktive debatet shoqërore. Bashkëpunimi i saj me Ambasadën Gjermane në Prishtinë për çështjet e politikave mediatike dhe informimet për delegacionet gjermane kanë kontribuar ndjeshëm në nxitjen e një kuptimi realist të Kosovës në mesin e politikëbërësve gjermanë”.
Në vlerësim të përkushtimit të saj të jashtëzakonshëm në promovimin e lirisë së shtypit, demokracisë dhe marrëdhënieve gjermano-kosovare, Presidentja Federale Gjermane vendosi të dekorojë Dr. Flutura Kusarin me Urdhrin e Meritave të Republikës Federale të Gjermanisë, përfundon komunikata e Ambasadës Gjermane.
Video
Video
Video
Video
Video
